अत्तरियामा मासुको विषयमा तीन पक्राउ, बाख्रा र कुकुरको मासु बेच्न लागेको आरोप 

काठमाडौँ । कैलालीको अत्तरियामा मासुको विषयलाई लिएर प्रहरीले तीन जनालाई पक्राउ गरेको छ। गोदावरी नगरपालिका–१ मा सञ्चालित मासु पसलबाट खसीको नाममा बाख्राको मासु बिक्री गरेको आरोपमा दुई जना पक्राउ परेका हुन्।

शुक्रबार धनगढी लाइनमा रहेको रफिक मासु पसलमा प्रहरीले छापा मार्दा पसल सञ्चालक ६५ वर्षीय भारतीय नागरिक रफिक कुरेसी र कञ्चनपुर कृष्णपुरका ४१ वर्षीय गणेश धामी फेला परेका थिए। उनीहरूलाई नियन्त्रणमा लिएर प्रहरीले बरामद मासु परीक्षणका लागि प्रयोगशालामा पठाएको प्रहरीले जनाएको छ।

प्रारम्भिक अनुसन्धानमा खसीको मासु भन्दै बाख्राको मासु बिक्री गरेको आरोप उनीहरूमाथि लागेको जिल्ला प्रहरी कार्यालय कैलालीका डीएसपी योगेन्द्र तिमिल्सिनाले बताए। घटनाको अनुसन्धान इलाका प्रहरी कार्यालय मालाखेतीले गरिरहेको छ।

यसअघि बिहीबार पनि सोही वडाको बसपार्कबाट प्रहरीले ६५ वर्षीय सुरेश नेपालीलाई नियन्त्रणमा लिएको थियो। कुकुर काटेर मासु बिक्री गर्न खोजिएको सूचना पाएपछि प्रहरी टोली त्यहाँ पुगेको थियो।

तर, नेपालीले भने आफूले खानका लागि स्यालको मासु काटेको प्रहरीलाई बताएका छन्। गोदावरी नगरपालिका–२ घर भएका नेपालीबाट बरामद मासु कुन जनावरको हो भन्ने अझै पुष्टि भइसकेको छैन। उक्त मासु पनि प्रयोगशालामा परीक्षणका लागि पठाइएको प्रहरीले जनाएको छ।

दुवै घटनामा बरामद मासुको परीक्षण रिपोर्ट आएपछि थप तथ्य खुल्ने प्रहरीले जनाएको छ।