सुरक्षा अपडेट

बाँसगढीमा दुई मोटरसाइकल ठोक्किँदा एक युवकको मृत्यु, तीन जना गम्भीर घाइते

सुरक्षाखबर

बुधबार, कात्तिक २५, २०८३

बाँसगढीमा दुई मोटरसाइकल ठोक्किँदा एक युवकको मृत्यु, तीन जना गम्भीर घाइते

बर्दिया । बर्दियाको बाँसगढीमा दुई मोटरसाइकल एकआपसमा ठोक्किँदा एक युवकको ज्यान गएको छ भने तीन जना गम्भीर घाइते भएका छन्। दुर्घटना बाँसगढी नगरपालिका–५ मोतिपुर जंगलस्थित भित्री सडकखण्डमा भएको हो।

दुर्घटनामा गुलरिया नगरपालिका–११ निवासी २४ वर्षीय ओमकार थारुको मृत्यु भएको प्रहरीले जनाएको छ। दुर्घटनामा गम्भीर घाइते भएका थारुलाई थप उपचारका लागि भारतको लखनउ लैजाने क्रममा बाटोमै मृत्यु भएको हो।

दुर्घटनामा बारबर्दिया नगरपालिका–३ बानियाभारका २५ वर्षीय आशिष थारु तथा भारतको लौकाइका १८ वर्षीय सहाबुदिन खान र २०र२२ वर्षीय जमाल खान गम्भीर घाइते भएका छन्।

प्रहरीका अनुसार भे ११ प ८५६७ नम्बरको मोटरसाइकल र भे ५ प ९१६१ नम्बरको मोटरसाइकल मंगलबार दिउँसो विपरीत दिशाबाट आउने क्रममा ठोक्किएका थिए।

भे ११ प ८५६७ नम्बरको मोटरसाइकल चालक आशिषको टाउकोमा चोट लागेको छ। उक्त मोटरसाइकलमा पछाडि सवार बाँसगढी नगरपालिका–७ का १८ वर्षीय रमन थारु भने सामान्य घाइते भएका थिए। उपचारपछि उनलाई अस्पतालले डिस्चार्ज गरिसकेको छ।
दुर्घटनामा संलग्न दुवै मोटरसाइकल प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।

प्रकाशित मिति: बुधबार, कात्तिक २५, २०८३

प्रतिक्रिया दिनुहोस्