गाँजा तस्करलाई पक्राउ गर्न प्रहरीले चलायो गोली

सुनसरी। गाँजा तस्करमाथि प्रहरीले गोली चलाएको छ। धरानमा गाँजा तस्करलाई पक्राउ गर्न सुनसरी प्रहरीले गोली चलाएको हो। 

सुनसरी प्रहरीका अनुसार धनकुटाबाट गाँजा लिएर आउँदै गरेको स्कोर्पियोमा सवार दुई जना भाग्न खोजेपछि स्थितिलाई नियन्त्रणमा लिन गएराति  प्रहरीले पक्राउ गर्न ४ राउन्ड गोली चलाएको कोशी प्रदेश प्रहरी कार्यालयले जानकारी दिएको छ। 

प्रहरीले गाँजा लिएर आउँदै गरेका दुई वटा गाडी र एक जना चालकलाई पक्राउ गरेको छ भने अर्का चालक फरार भएको प्रहरीले जनाएको छ। प्रहरीले दुबै गाडीबाट गरेर ६ क्विन्टल ४१ किलो गाँजा बरामद गरेको छ।

प्रहरीका अनुसार नियन्त्रणमा लिइएका प्राइभेट गाडीमा सरकारी नम्बर प्लेट राखेर गाँजा तस्करी हुँदै थियो।

पक्राउ गरेका एक चालकसँगको अनुसन्धानमा क्रममा उनले उक्त गाँजा भारत लैजान लागिएको बताएको कोशी प्रदेश प्रहरीले जनाएको छ।