नारायणीमा पौडी खेल्ने क्रममा एकै घरका दुई बालक डुबेर बेपत्ता

काठमाडौं । नारायणी नदीमा पौडी खेल्न गएका एकै घरका दुई बालक बेपत्ता भएका छन् । पूर्वी नवलपरासीको मध्यविन्दु नगरपालिकाका एकै घरका दुई बालक नारायणी नदीमा गएका बेला बेपत्ता भएको प्रहरीले जानकारी दिएको छ।

पौडी खेल्न गएका ५ जनामध्ये मध्यविन्दु-१२ तमासपुरका धनन्जय पौडेलका छोरा १६ वर्षीय विजय र हरि पौडेलका छोरा १२ वर्षीय पवन बेपत्ता भएको प्रहरीले जनाएको छ।

प्रहरीका अनुसार नारायणीमा वेपत्ता भएका बालकहरु एउटै परिवारका दुई भाइका छोरा हुन् । विजयले भने हालै मात्र एसईई परीक्षा दिएका थिए ।  मध्यविन्दु नगरपालिकाको-१५ को सीमा क्षेत्रमा पर्ने अरुणखोला र नारायणी नदीको संगमस्थल सशलाघाटमा उनीहरु पौडी खेल्न गएका थिए । उनीहरु बेपत्ता भएको जानकारी मंगल बार साँझ साढे ६ बजेतिर पाएपछि स्थानीयले प्रहरीलाई खबर गरेका थिए ।

गएराति १२ बजेसम्म उनीहरुको खोजतलास गरेपनि फेला नपरेको प्रहरीले जानकारी दिएको छ। बेपत्ता भएकाहरुको सशस्त्र प्रहरीको गोताखोरको टोलीले आज बिहानैबाट पुनः खोजी कार्य गरिरहेको प्रहरीले जानकारी दिएको छ।