डोटीमा जिप दुर्घटना हुँदा एक जनाको मृत्यु,८ जना घाइते

डोटी ।डोटीको केआईसिंह गाउँपालिका-५ केदार गाउँमा आज बिहान जिप दुर्घटना हुँदा एक जनाको मृत्यु भएको छ भने अन्य आठ जना घाइते भएका छन्।

जिल्ला प्रहरी कार्यालयका सूचना अधिकारी दीपेन्द्रकुमार पालका अनुसार, बोगटान फुड्सिलको गगुडाबाट दिपायलतर्फ आउँदै गरेको सुपप्र ०१-००१ ज १४६४ नम्बरको जिप दुर्घटना भएको हो। 

दुर्घटनामा बोगटान फुड्सिल गाउँपालिका-६, गगुडाका ४२ वर्षीय मीन बमको मृत्यु भएको छ।गम्भीर घाइते भएका बमलाई उपचारका लागि शैलेश्वरी अस्पताल, दिपायल पुर्‍याउँदा चिकित्सकले मृत घोषणा गरेका थिए।

प्रहरीका अनुसार, दुर्घटनामा जिप चालकसहित आठ जनाको शैलेश्वरी अस्पताल, दिपायलमा उपचार भइरहेको छ। 

घाइतेमध्ये एकको अवस्था गम्भीर, पाँचको मध्यम र दुई जनाको अवस्था सामान्य रहेको प्रहरीका सूचना अधिकारी पालले जानकारी दिए।