काठमाडौं जिल्ला अदालतबाट हतकडीसहित भागेका थुनुवा बसपार्कबाट पक्राउ

काठमाडौं । काठमाडौं जिल्ला अदालतबाट हतकडीसहित भागेका थुनुवा काठमाडौं बसपार्कबाट पक्राउ परेका छन् ।

 चोरी मुद्दामा थुनामा रहेका पश्चिम रूकुमको बाँफिकोट गाउँपालिका–१ घर भएर हाल काठमाडौं गोंगबु बस्ने २१ वर्षीय निराजनजंग ठकुरी भन्ने दशरथ शाही हतकडीसहित आज बिहान ११ बजे अदालतबाट फरार भएका थिए।

आज अदालतमा थुनछेक बहसका लागि ल्याइएका दशरथ  अदालतबाटै फरार भए लगत्तै खोजतासका क्रममा प्रहरीले उनलाई बसपार्कबाट आज साँझ ५ बजे नियन्त्रणमा लिएको काठमाडौं प्रहरी परिसरले जानकारी दिएको छ।  प्रहरी वृत सोह्रखुट्टेको प्रहरी हिरासतमा रहेका दशरथलाई आज  अदालतमा उपस्थित गराइएको थियो ।

प्रहरीका अनुसार काठमाडौं जिल्ला अदालतको ४ नम्बर इजलासमा थुनछेक बहस भइरहेका बेला पिसाब लाग्यो भन्दै शौचालय  जाने निहुँमा दशरथ  हतकडीसहित फरार भएका थिए।