करेन्ट लागेर सुर्खेतको नेवारेमा श्रीमान् श्रीमतीको मृत्यु

काठमाडौं । घरमै रहेको घाँस काट्ने विद्युतीय मेसिनको तारबाट करेन्ट लागेर श्रीमान् श्रीमतीको मृत्यु भएको छ। 

सुर्खेतको वीरेन्द्रनगर नगरपालिका-१२ नेवारेमा सोही स्थानका ५५ वर्षीय धनीराम आचार्य र उनकी ५० वर्षीया श्रीमती धनकुमारी उपाध्यायको करेन्ट लागेर मृत्यु भएको प्रहरीले जानकारी दिएको छ।

जिल्ला प्रहरी कार्यालय सुर्खेतका अनुसार आज बिहान ११ बजे करेन्ट लागेर गम्भीर घाइते भएका दुबै जनालाई सुर्खेतस्थित प्रदेश अस्पताल कालागाउँमा उपचारका क्रममा अस्पताल पुर्‍याएको केहीबेरमै मृत्यु भएको हो।

प्रहरीले घटना सम्बन्धमा थप आवश्यक अनुसन्धान सुरु गरेको जनाउँदै दुबै शवलाई पोस्टमार्टमका लागि अस्पतालमै राखिएको बताएको छ।