१७ वर्षीया किशोरीमाथि चक्कु प्रहार,उपचारका क्रममा मृत्यु

काठमाडौं । सेकुवा कर्नरमा काम गर्ने १७ वर्षीया किशोरीको चक्कु प्रहारबाट हत्या भएको छ। कैलालीको बर्दगोरिया गाउँपालिका-१ स्थित ’राजधानी सेकुवा एण्ड मम: सेन्टर’मा कार्यरत सोही गाउँपालिका-३ की याचना सेजवालको हत्या भएको प्रहरीले जानकारी दिएको छ।

कैलाली प्रहरीका अनुसार अनुसार आज बिहान करिब १० बजेतिर सेजवालमाथि सोही सेकुवा सेन्टरमा काम गर्ने बर्दगोरिया-१ का ३३ वर्षीय नृप साउदले चक्कु प्रहार गरेका थिए।

चक्कु प्रहारबाट गम्भीर घाइते भएकी सेजवाललाई उपचारका लागि तत्काल धनगढीको निसर्ग हस्पिटलमा लगिएकोमा उपचारकै क्रममा उनको मृत्यु भएको प्रहरीले  जानकारी दिएको छ।

प्रहरीले चक्कु प्रहार गरेर याचनाको हत्या गर्ने साउदलाई नियन्त्रणमा लिएको जानकारी दिएको छ। हत्याको कारणबारे भने अझै खुल्न सकेको छैन भने घटनाबारे थप अनुसन्धान भइरहेको जिल्ला प्रहरी कार्यालय कैलालीले  जनाएको छ।