गुन्डा नाइके राजु गोर्खालीलाई हिरासतमा राखेर अनुसन्धान गर्न प्रहरीले पायो अदालतको अनुमति

काठमाडौं । काठमाडौंबाट करोडौं रुपैयाँको चेक बाउन्स मुद्दामा पक्राउ परेका गुन्डा नाइके राजु गोर्खाली (राजेन्द्रबहादुर गोर्खाली) हिरासतमा राखेर अनुसन्धान गर्न अदालतले प्रहरीलाई अनुमति दिएको छ।

आज काठमाडौं जिल्ला अदालतमा उपस्थित गराइएका गोर्खालीलाई चेक बाउन्स मुद्दामा थप ५ दिन हिरासतमा राखेर अनुसन्धान गर्न अदालतले प्रहरीलाई अनुमति दिएको जिल्ला प्रहरी परिसर काठमाडौंले जानकारी दिएको छ।

आइतबार गोर्खालीलाई काठमाडौं प्रहरी परिसरबाट खटिएको टोलीले चन्द्रागिरि क्षेत्रबाट पक्राउ गरेको थियो। प्रहरीका अनुसार उनीविरुद्ध १० करोड रुपैयाँ चेक बाउन्स मुद्दा दायर भएको हो।

गुन्डा नाइके गोर्खालीलाई प्रहरीले विगतमा  गुण्डागर्दीको आरोपमा पक्राउ गरे पनि उनी रिहा हुँदै आएका थिए।

गोर्खाली  २०७९ सालको प्रतिनिधिसभा चुनावमा नेपाली कांग्रेसबाट सिन्धुपाल्चोक २ मा उम्मेदवार सिफारिसमा समेत परेका थिए ।