नेभिगेशन
अपराध

अपहरणपछि १५ वर्षीय बालकको बीभत्स हत्या, परिवारसँग मागिएको थियो ५ करोड फिरौती

काठमाडौं । १५ वर्षीय बालकको अपहरणपछि  बीभत्स हत्या भएको अवस्थामा शव फेला परेको छ। तीन दिनअधि बेपत्ता भएका सिरहाको गोलबजार नगरपालिका–१३ स्थित दुर्गापुर डङ्ग्राहका संजय सिंहका छोरा १५ वर्षीय बालक अभिषेक कुमार सिंहको शव आज बिहान फेला परेको प्रहरीले जानकारी दिएको छ।

आइतबारदेखि बेपत्ता भएका बालक अभिषेकको शव अर्जुन आधारभूत विद्यालय नजिकै विभत्स अवस्थामा भेटिएको प्रहरीले जनाएको छ। हत्या गरिएका बालकका आफन्त र छरछिमेकसहित ८ जनालाई नियन्त्रण लिएर सोधपुछ थालिएको सिराहा प्रहरी स्रोतले जनाएको छ ।

सिरहा प्रहरीका अनुसार सुरुमा परिवारले अभिषेक  साथीहरूसँग ‘झिंजिया’ हेर्न गएको ठानेर त्यति धेरै खोजतलास गरेनन्। तर, अर्को बिहानसम्म पनि उनी घर नफर्किएपछि परिवारले खोजतलास सुरु गरेको थियो। 

परिवारलाई मोबाइलमा इमोमार्फत ५ करोड रुपैयाँ फिरौती माग गरिएको सन्देश आएको पाइएको प्रहरीले बताएको छ। हिन्दीमा लेखिएको उक्त सन्देशमा सेप्टेम्बर २५ भित्र रकम बुझाउन भनिएको थियो। साथै, प्रहरी वा पत्रकारलाई खबर गरेमा जे पनि हुन सक्ने धम्की पनि दिइएको थियो।

सिराहा प्रहरीले शवको मुचुल्का उठाई पोस्टमार्टमका लागि प्रादेशिक अस्पताल सिरहा पठाएको छ भने घटनाका बारेमा थप अनुसन्धान र नियन्त्रणमा लिइएकाहरुसँग सोधपुछ  भइरहेको जनाएको छ।

प्रकाशित मिति:
प्रतिक्रिया दिनुहोस्