इ-रिक्सा चालक चौधरीको गोली हानेर हत्या

काठमाडौं  । इ-रिक्सा (सिटी सफारी) चालकको गोली हानेर हत्या गरिएको छ। ४७ वर्षीय चालक दिनेशकुमार चौधरीको हत्या भएको प्रहरीले जानकारी दिएको छ। 

प्रहरीका अनुसार सुनसरीस्थित रामधुनी नगरपालिका-२ तनमुनामा शनिबार साँझ ४७ वर्षीय दिनेशकुमारको हत्या भएको हो । सुनसरी प्रहरीले दिएको जानकारी अनुसार दिनेशकुमारको छातीमा गोली हानेको देखिएको छ।

रामधुनी नगरपालिका-२  कर्मनिया टोलस्थित भित्री सडक खण्डमा उत्तरबाट दक्षिणतर्फ जाँदै गरेको प्र १–०२–००४ ह ७८०४ नम्बरको इ-रिक्सा रोकेर चालक दिनेशकुमारलाई मोटरसाइकलमा आएको ३ जनाको टोलीले हत्या गरेको प्रहरीले जनाएको छ।

दिनेशकुमारको शव सडकमा रोकेर राखेको सिटी सफारीबाट करिब २०० मिटर टाढा फेला परेको जिल्ला प्रहरी कार्यालय सुनसरीले बताएको छ। 

प्रहरीले हत्या घटनाको अनुसन्धान सुरु गर्दै पोष्टमार्टमपछि मात्रै सबै कुरा खुल्ने सुनसरी प्रहरीले जानकारी दिएको छ भने हत्यामा संलग्नहरुको खोजीकार्य तीब्र पारिएको छ।