नेपालगन्जस्थित उच्च अदालतमा आगजनी र लूटपाट गर्ने ६ जना पक्राउ

बाँके । जिल्ला प्रहरी कार्यालय बाँकेले उच्च अदालत तोडफोड,आगजनी र लूटपाटमा संलग्न रहेको आरोपमा ६ जनालाई पक्राउ गरेको छ।

बाँके प्रहरीका अनुसार गत भदौ २४ गते जेनजी आन्दोलनका क्रममा अपराधिक समूहले घुसपैठ गरेर उच्च अदालत तुलसीपुर,नेपालगन्ज इजलासमा तोडफोड,आगजनी र लूटपाट गरेको थियो।

जिल्ला प्रहरी कार्यालय बाँकेको लामो अनुसन्धान पश्चात् उक्त कार्यमा संलग्न रहेकाहरुको पहिचान गरेर पक्राउ गरिएको जनाएको छ। पक्राउ पर्नेहरुमा नेपालगन्ज-४ बस्ने रवि कुमार वैश्य, नेपालगन्ज-१० का बल्लु गोडिया,नेपालगन्ज-९ का  गंगा सागर वर्मा, नेपालगन्ज -५ बस्ने मो. ताहिर हलवाई, नेपालगन्ज- ४ बस्ने एशन राज सिद्दिकी र  नेपालगन्ज-९ बस्ने ओमराज सोनी रहेको जिल्ला प्रहरी कार्यालय बाँकेले जनाएको छ।

कात्तिक ३० गते पक्राउ परेका उनीहरुविरुद्ध ५ दिनको म्याद लिएर सोमबारदेखि थप अनुसन्धान अगाडि बढाएको बाँके प्रहरीले जानकारी दिएको छ।