ट्याग नम्बर १४५५ ले खोलेको बसपार्क हत्याको रहस्य

काठमाडौं । काठमाडौं बसपार्क नजिक शनिबार पोको पारेर छाडिएको अवस्थामा भेटिएको युवतीको हत्या एक हप्ताअघि भएको रहेको तथ्य प्रहरीले सार्वजनिक गरेको छ। पहिचान भएकी मृतक २४ वर्षीया माया (आयुषा) मगरको हत्या कात्तिक २६ को मध्यराति नै भएको अनुसन्धानमा खुलेको हो।

जिल्ला प्रहरी परिसर काठमाडौंका एसपी पवनकुमार भट्टराईका अनुसार घटनामा संलग्न रहेको आशंकामा होटल रोयल कुन्डलामा काम गर्ने २४ वर्षीय सूर्य थापा मगरलाई नियन्त्रणमा लिइएको छ। शव फेला परेपछि गरिएको प्रारम्भिक निरीक्षणमा प्लास्टिक र तन्नाले बेरिएको अवस्थामा राखिएको देखिएको थियो। शनिबार बिहान आएको दुर्गन्धका कारण स्थानीयले प्रहरीलाई खबर गरेका थिए।

प्रहरीले घटनास्थलमा भेटिएको तन्नाको ट्याग नम्बर १४५५ लाई आधार मानेर खोजी अघि बढाएको थियो। यही ट्यागको मिलान होटलको स्टाफ रूममा रहेका तन्ना र तकियामा भेटिएपछि प्रहरी सूर्यसम्म पुग्न सफल भएको हो। होटलका सञ्चालक तथा प्रबन्धक भने घटनाबारे अनभिज्ञ रहेको बयान दिएका छन्।

अनुसन्धानका क्रममा कात्तिक २५ मा माया, डोल्मा बमजन र सूर्य त्यही होटलमा पुगेको पुष्टि भएको छ। माया लागुऔषध प्रयोग गर्थिन् र ब्राउन सुगर किन्न भन्दै सूर्यसँग ५०० रुपैयाँ लिएको प्रहरीको भनाइ छ। पैसा फिर्ता माग्दा भएको विवादले हत्या भएको अनुसन्धानले देखाएको छ। आवेशमा आएका सूर्यले जुत्ताको तुना प्रयोग गरी मायाको घाँटी थिचेको र त्यसपछि थप प्रहार गरेको स्वीकारेका छन्।

हत्या भएको भोलिपल्ट बिहान १:५२ बजे सूर्यले शव बोकेर होटलबाट बाहिर लगिरहेको दृश्य सिसिटिभी फुटेजमा पनि रेकर्ड भएको प्रहरीले जनाएको छ।