बारा सीमा सुरक्षाका 'फ्रन्टलाइन कमाण्डर’,जसले गर्दैछन् सीमा अपराधविरुद्ध निरन्तर प्रहार

बारा । सीमा सुरक्षाको ‘फ्रन्टलाइन कमाण्डर’ बन्दै सीमा अपराध र अवैध तस्करीविरुद्ध निरन्तर प्रहार गरिरहेका सशस्त्र प्रहरी बल नेपाल नं.१२ गण, बारा प्रमुख एसपी खुम केसीको कुशल र सशक्त कमान्डमा सीमा सुरक्षामा सशस्त्र प्रहरीले उल्लेखनीय उपलब्धि हासिल गरेको छ। गत फागुन महिनादेखि हालसम्मको अवधिमा एसपी केसीको नेतृत्वमा रहेको बारा सशस्त्र प्रहरीले ५ करोड ४३ लाख ६२ हजार ८४५ रुपैयाँ बराबरको विभिन्न किसिमका अवैध सामग्री बरामद गर्दै सीमा अपराध नियन्त्रणमा महत्वपूर्ण भूमिका निर्वाह गरेको हो।

एसपी केसीको सक्रिय निर्देशनपछि पछिल्लो समयमा पनि सशस्त्र प्रहरीले नाकाबाट हुन सक्ने अवैध गतिविधिविरुद्ध कडा निगरानी र निरन्तर गस्ती सञ्चालन गरिरहेको छ। सशस्त्र प्रहरीले यस अवधिमा सवारीसाधनसहित ठूलो परिमाणको लागुऔषध र कारोबारमा संलग्न व्यक्तिहरूलाई नियन्त्रणमा लिनुका साथै हातहतियार बरामद गर्न बारा सशस्त्र प्रहरी सफल भएको छ।

मानव बेचबिखन नियन्त्रणका क्षेत्रमा पनि एसपी केसीको दृढ नेतृत्वमा सशस्त्र प्रहरीले अदम्य साहस देखाउँदै प्रभावकारी कारबाही गरेको छ। सीमा क्षेत्रमा हुने अवैध घुसपैठ रोकथाम, सीमा स्तम्भको सुरक्षा तथा आन्तरिक सुरक्षालाई चुस्त बनाउने कार्यमा सशस्त्र प्रहरीले निरन्तर सफलता हासिल गर्दै आएको छ। एसपी केसीको कमान्डमा रहेको सशस्त्र प्रहरी बल  बाराले २४ सै घण्टा एकल सीमा गस्ती गर्दै भारतीय सशस्त्र सीमा बलसँग संयुक्त गस्तीलाई समेत तीव्र बनाएको छ, जसले सीमा सुरक्षालाई थप मजबुत बनाएको छ।

विपद् व्यवस्थापन तथा उद्धारमा पनि बारा सशस्त्र प्रहरीले तदारुकता देखाउँदै उत्कृष्ट कार्य सम्पादन गरेको जनाइएको छ। साथै, समुदायसँगको सम्बन्ध सुदृढ बनाउने उद्देश्यले विभिन्न जनचेतनामूलक कार्यक्रमहरू सञ्चालन गरिएको र “सशस्त्र प्रहरीसँग सीमावासी” कार्यक्रममार्फत सीमावासीसँग सहकार्य बढाइएको छ।

सीमामा हुने अवैध गतिविधि नियन्त्रण, शान्ति सुरक्षाको प्रत्याभूति र जनविश्वास आर्जन गर्न एसपी केसीको नेतृत्वको बारा सशस्त्र प्रहरीले खेलेको भूमिका अत्यन्त सर्हानीय र प्रेरणादायी भएको  सरोकारवालाहरूको भनाइ छ।