'सिटी सफारी' दिनेश हत्या प्रकरण:७ अभियुक्त पक्राउ, तन्त्र–मन्त्रका नाममा हत्या

काठमाडौं । सुनसरीको रामधुनी नगरपालिका–२ कर्मनिया टोलमा सिटी सफारी चालक दिनेशकुमार चौधरीको हत्या प्रकरणमा संलग्न रहेको आरोपमा प्रहरीले सात जनालाई पक्राउ गरेको छ। गत असोज २५ गते साँझ चौधरीमाथि गोली प्रहार गरी हत्या भएको थियो।

जिल्ला प्रहरी कार्यालय सुनसरीका एसपी केशवकुमार थेबेका अनुसार पक्राउ पर्नेहरूमा रामधुनी–१ का ४३ वर्षीय राजकिशोर साह, ४० वर्षीय नन्दकिशोर साह, राजविराज–१६ का २८ वर्षीय अङ्कित साह र प्रिन्सकुमार दास, भोक्राहा नरसिंह–५ का ३४ वर्षीय मोहम्मद इब्रान मिया, देवानगञ्ज–४ का ३७ वर्षीय गियास मन्सुरी र देवानगञ्ज–५ का २५ वर्षीय मिथिलेस यादव छन्।

प्रदेश १–०२–००४ ह ७८०४ नम्बरको सिटी सफारी चलाउने चौधरीलाई अपरिचित व्यक्तिहरूले गोली हानी हत्या गरेपछि प्रहरीले विशेष टोली गठन गरी प्राविधिक विवरण, स्थानीयवासी तथा परिवारजनका बयानका आधारमा अनुसन्धान अघि बढाएको थियो।

प्रारम्भिक अनुसन्धानबाट चौधरीले तन्त्र–मन्त्रका नाममा परिवारलाई लामो समयदेखि दबाब र दुःख दिएको आरोप लगाउँदै योजनाबद्ध रूपमा हत्या गराइएको आशंका प्रबल भएको प्रहरीको दाबी छ। 

सुनसरी र सप्तरीका विभिन्न स्थानबाट पक्राउ परेका सबैले प्रारम्भिक बयानमा घटनामा संलग्नता स्वीकार गरेको प्रहरीले जनाएको छ। उनीहरू विरुद्ध कर्तव्य ज्यान मुद्दा दर्ता गरिएको छ भने मङ्सिर १७ गतेदेखि १२ दिनको म्याद थप गरी थप अनुसन्धान जारी रहेको जिल्ला प्रहरी कार्यालयले जनाएको छ।