धनौली इलाका प्रहरी कार्यालयमा विद्यार्थीको अवलोकन भ्रमण, सुरक्षा सचेतना प्रदान

बाँके । इलाका प्रहरी कार्यालय धनौलीमा प्रहरी सेवा र सुरक्षासम्बन्धी जानकारी लिन लिटिल हाडवर एकेडेमी, खजुरा बाँकेमा अध्ययनरत कक्षा ४ देखि ७ सम्मका करिब ८० जना विद्यार्थीले आज अवलोकन भ्रमण गरेका छन् ।

अवलोकन भ्रमणका क्रममा विद्यार्थीहरुलाई प्रहरीको भूमिका, सेवा प्रवाह, नागरिक सुरक्षाका आधारभूत उपाय तथा कानुनी सचेतनासम्बन्धी जानकारी प्रदान गरिएको इलाका प्रहरी कार्यालय धनौलीले जानकारी दिएको छ।

इलाका प्रहरी कार्यालय धनौलीका प्रहरी बरिष्ठ नायब निरीक्षक लोकेन्द्रसिंह कार्की तथा प्रहरी सहायक निरीक्षक  दिनेश कुमार चदाराले विद्यार्थीहरुलाई प्रशिक्षण दिएका थिए । प्रशिक्षणमा दैनिक जीवनमा अपनाउनुपर्ने सुरक्षा सतर्कता, विपद्‌का बेला गर्ने व्यवहार, आपतकालीन अवस्थामा प्रहरीसँग कसरी सम्पर्क गर्ने लगायतका विषयमा जानकारी गराइएको थियो ।

विद्यार्थीहरुले प्रहरी कार्यालयको कार्यप्रणाली नजिकबाट बुझ्न पाउँदा उत्साहित भएको प्रतिक्रिया दिएका छन् । यस प्रकारको कार्यक्रमले बालबालिकामा सुरक्षा सचेतना र प्रहरीप्रति सकारात्मक धारणा विकास गर्न सहयोग पुग्ने बताइएको छ।