डलर सटहीको प्रलोभन देखाई ठग्ने गिरोह झण्डै १० लाखसहित सिन्धुपाल्चोक प्रहरीको नियन्त्रणमा

काठमाडौं । सस्तो दरमा डलर सटही गरिदिने प्रलोभन देखाई सर्वसाधारणलाई ठगी गर्दै गरेको गिरोहलाई प्रहरीले पक्राउ गरेको छ।

सिन्धुपाल्चोकको लिसंखुपाखर गाउँपालिका–५ मुडेमा पुस १४ गते अन्दाजी साँझ साढे ४ बजेतिर ठगी गतिविधि भइरहेको भन्ने गोप्य सूचनाको आधारमा जिल्ला प्रहरी कार्यालय सिन्धुपाल्चोक मातहत इलाका प्रहरी कार्यालय बाह्रबिसेबाट खटिएको प्रहरी टोलीले घटनास्थलमा पुगेर ठगी कार्यमा संलग्न ४ जनालाई रंगेहात नियन्त्रणमा लिएको हो।

सिन्धुपाल्चोक प्रहरीका अनुसार पक्राउ पर्नेहरूमा बाह्रबिसे नगरपालिका–६ बस्ने अन्दाजी ४२ वर्षीय मकर ध्वज तामाङ, बाह्रबिसे नगरपालिका–३ बस्ने अन्दाजी ४५ वर्षीय जितबहादुर तामाङ, सोही स्थानका अन्दाजी ३५ वर्षीय छिरिङ दोर्जे लामा र बाह्रबिसे नगरपालिका–३ बस्ने अन्दाजी २४ वर्षीया सबिना तामाङ रहेका छन्।

प्रहरीले  उनीहरूको साथबाट नगद रु. ९ लाख ९५ हजार रुपैयाँ, दुई वटा मोटरसाइकल, ६ थान मोबाइल फोन तथा एक थान चेकबुक बरामद गरेको जिल्ला प्रहरी कार्यालय सिन्धुपाल्चोकले जानकारी दिएको छ।

पक्राउ परेका व्यक्तिहरूलाई ठगी सम्बन्धी कसूरमा प्रचलित कानूनबमोजिम थप अनुसन्धान कार्य भइरहेको जिल्ला प्रहरी कार्यालय सिन्धुपाल्चोकले जनाएको  छ।

सिन्धुपाल्चोक प्रहरीले अनुरोध गर्दै भनेको छ-"यस प्रकारका ठगी घटनाबाट बच्न अपरिचित व्यक्ति वा समूहले अस्वाभाविक रूपमा सस्तो दरमा सटही गरिदिने प्रस्ताव, सामाजिक सञ्जालमा पठाइने फोटो वा भिडियोको आधारमा मात्र विश्वास नगर्न तथा अपरिचित नम्बरबाट आउने बारम्बारको फोन सम्पर्कप्रति सचेत रहन अनुरोध  छ। यस्ता शङ्कास्पद गतिविधि देखिए वा थाहा भएमा नजिकको प्रहरी कार्यालय वा प्रहरी आपतकालीन नम्बर १०० मा तुरुन्त जानकारी गराउनुहोला।-