२७ वर्षीय छोराले गरे आफ्नै आमाको हत्या

काठमाडौँ ।  एक युवकले आफ्नै ५० वर्षीया आमाको हत्या गरेका छन्।

भक्तपुरको मध्यपुर थिमि नगरपालिका–३ मा डेरामा बस्दै आएका २७ वर्षीय प्रवीण भण्डारीले ५० वर्षीया आमा सरिता भण्डारीमाथि शुक्रबार राति आक्रमण गरेको प्रहरीले जानकारी दिएको छ। 

जिल्ला प्रहरी परिसर भक्तपुरका अनुसार गए राति करिब ११ बजे भएको घटनामा गम्भीर घाइते आमा सरिता भण्डारीलाई उपचारका लागि भक्तपुर इन्टरनेशनल अस्पताल लगिएको थियो। तर उपचारकै क्रममा उनको मृत्यु भएको प्रहरीले जनाएको छ।

प्रहरी नायव उपरीक्षक प्रकाश जबेगुका अनुसार प्रारम्भिक अनुसन्धानमा प्रवीण मानसिक समस्याबाट पीडित रहेको देखिएको छ। घटनामा प्रवीण स्वयं पनि घाइते भएका छन् र उनको उपचार भइरहेको छ।

धनुषाको मिथिला नगरपालिका–११ स्थायी घर भएका आमा–छोरा मध्यपुर थिमिमा भाडामा बस्दै आएका थिए। घटनाबारे थप अनुसन्धान भइरहेको प्रहरीले जनाएको छ।