ट्राफिक प्रहरीले दियो ४७ प्रहरी कर्मचारीलाई ट्राफिक नियन्त्रण तालिम

काठमाडौं । ट्राफिक प्रहरीले  ४७ जना प्रहरीलाई ट्राफिक नियन्त्रण सम्बन्धी तालिम प्रदान गरेको छ। राष्ट्रिय प्रहरी प्रशिक्षण प्रतिष्ठान महाराजगंजको तत्वावधानमा सञ्चालन गरिएको उक्त तालिम १५५औँ समूह अन्तर्गत सम्पन्न भएको हो।

मंगलबार काठमाडौं उपत्यका ट्राफिक प्रहरी कार्यालय रामशाहपथमा आयोजित तालिम समापन कार्यक्रममा कार्यालयका प्रमुख प्रहरी वरिष्ठ उपरीक्षक नवराज अधिकारीले तालिम समापन गर्दै प्रशिक्षार्थीहरूलाई पुरस्कार तथा प्रमाणपत्र वितरण गरे।

कार्यक्रमलाई सम्बोधन गर्दै प्रहरी वरिष्ठ उपरीक्षक अधिकारीले तालिमका क्रममा प्राप्त ज्ञान र सीपलाई कार्यक्षेत्रमा इमान्दारिताका साथ कार्यान्वयन गर्न आग्रह गरेका छन् । साथै, प्राप्त जिम्मेवारीलाई त्रुटिरहित ढंगबाट निर्वाह गर्दै नागरिकलाई सहज, सुरक्षित र प्रभावकारी ट्राफिक व्यवस्थापनको अनुभूति गराउनुपर्नेमा उनले जोड दिएका थिए।

तालिम संयोजक प्रहरी नायव उपरीक्षक शैलेश न्यौपानेले तालिम सम्बन्धी प्रतिवेदन प्रस्तुत गर्दै मंसिर ७ गतेदेखि सञ्चालन भएको ४५ कार्यदिने तालिममा प्रहरी सहायक हवल्दार ३ जना र प्रहरी जवान ४४ जना गरी कुल ४७ जना प्रशिक्षार्थी सहभागी भएको जानकारी दिएका छन् ।