श्रीमान्-श्रीमती मृत भेटिए, लुटपाटपछि हत्या गरिएको आशंका

काठमाडौं । लुटपाटपछि एक दम्पतीको वीभस्त हत्या गरिएको छ। ओखलढुङ्गाको चिशंखुगढी गाउँपालिकामा लुटपाटपछि दम्पतीको वीभस्त हत्या भएको घटना सार्वजनिक भएको छ। 

गाउँपालिका–६  भदौरेस्थित बोहोरेमा बसोबास गर्दै आएका चन्द्र विक्रम राई र उनकी श्रीमती चन्द्रमाया राई मृत अवस्थामा फेला परेको जिल्ला प्रशासन कार्यालयले जनाएको छ।

प्रहरीले घटनाको सूचना प्राप्त हुनासाथ जिल्ला प्रहरी प्रमुखसहितको टोली घटनास्थलतर्फ खटिइएको छ। प्रारम्भिक जानकारीअनुसार लुटपाटपछि हत्या गरिएको हुनसक्ने आशंका स्थानीयवासीले गरेका छन्।

जिल्ला प्रहरी कार्यालय ओखलढुङ्गाका प्रहरी नायब उपरीक्षक मदन केसीले घटनाको खबर पाउनेबित्तिकै आफू स्वयं घटनास्थलतर्फ प्रस्थान गरेको जानकारी दिएका छन्। 

यसअघि पनि सोही चिशंखुगढी गाउँपालिकामा दुई जनाको हत्या भएको घटना भएको थियो, जसले स्थानीयमा सुरक्षा चिन्ता थपिएको छ। घटनाबारे थप अनुसन्धान भइरहेको र विस्तृत विवरण आउन बाँकी रहेको प्रहरीले जनाएको छ।