प्रहरी सेवा जागिर मात्र होइन, जिम्मेवार जीवनशैली हो: आईजीपी कार्की

काठमाडौँ। प्रहरी प्रमुख (आईजीपी) दानबहादुर कार्कीले प्रहरी सेवा जागिरभन्दा बढी जिम्मेवार र अनुशासित जीवनशैली भएको बताएका छन्।

महाराजगन्जस्थित राष्ट्रिय प्रहरी प्रशिक्षण प्रतिष्ठानमा आयोजित प्रहरी निरीक्षक दीक्षान्त समारोहलाई सम्बोधन गर्दै उनले राज्यले दिएको अधिकारलाई दायित्वका रूपमा बुझ्न नयाँ इन्स्पेक्टरहरूलाई निर्देशन दिएका छन् ।

१८ महिना लामो तालिमपछि १८३औँ समूहका ९२ जना प्रहरी निरीक्षक दीक्षित भएका छन्, जसमा ९ महिला र ८३ पुरुष छन्। कार्कीले सुरक्षामा हुने लगानी अब अनुत्पादक होइन, समयअनुकूल र आवश्यक भएको उल्लेख गर्दै प्रहरी संस्था पुनः नागरिक सेवामा केन्द्रित भएको बताए।