मन्दिर परिसरमा उच्छृङ्खल गतिविधि गर्ने १५५ जना पक्राउ

काठमाडौँ । महाशिवरात्रि पर्वका अवसरमा पशुपतिनाथ मन्दिर आसपासको क्षेत्रमा सुरक्षाकर्मीले कडाइ गरेपछि १५५ जनालाई नियन्त्रणमा लिइएको छ। भीडभाडको मौका छोपी उच्छृङ्खल गतिविधि हुनसक्ने आकलनका आधारमा प्रहरी सक्रिय बनेको हो।

जिल्ला प्रहरी परिसर काठमाडौँका प्रमुख एसपी पवन भट्टराईका अनुसार पक्राउ परेकामध्ये केही सिक्री लुटपाट, चोरी तथा लागुऔषध ९गाँजा० कारोबारमा संलग्न रहेको प्रारम्भिक अनुसन्धानबाट खुलेको छ। केही व्यक्तिलाई भने शंकास्पद गतिविधिका आधारमा सोधपुछका लागि नियन्त्रणमा लिइएको उनले जानकारी दिए।

उनका अनुसार पूर्वसूचनाको आधारमा सम्भावित अवाञ्छित गतिविधि रोक्न निगरानी बढाइएको थियो। “सुरक्षालाई प्राथमिकता दिँदै शंकास्पद व्यक्तिहरूलाई अनुसन्धानका लागि नियन्त्रणमा लिएका हौँ,” उनले बताए।

नियन्त्रणमा लिइएकाहरूलाई प्रहरी वृत्त गौशालामा राखेर आवश्यक जाँच तथा स्क्रिनिङ प्रक्रिया अघि बढाइएको छ। अनुसन्धानपछि प्रमाणका आधारमा कानुनी प्रक्रिया अघि बढाइने प्रहरीले जनाएको छ।

महाशिवरात्रिमा लाखौँ भक्तजन पशुपति क्षेत्रमा आउने भएकाले शान्ति–सुरक्षा कायम राख्न विशेष सुरक्षा योजना लागू गरिएको थियो।