लागुऔषध कारोबारीमाथि हवाई फायर: साढे ३७ ग्राम बढी ब्राउनसुगरसहित एकजना पक्राउ

सुर्खेत। सुर्खेतको वीरेन्द्रनगर नगरपालिका–८ बाट प्रहरीले ठुलो परिमाणमा ब्राउनसुगरसहित एक जनालाई पक्राउ गरेको छ।

सोमबार राति करिब १० बजे लागूऔषधको कारोबार भइरहेको भन्ने गोप्य सूचनाका आधारमा जिल्ला प्रहरी कार्यालय सुर्खेत र लागूऔषध नियन्त्रण शाखा कार्यालय सुर्खेतबाट खटिएको संयुक्त प्रहरी टोलीले उक्त स्थानमा पुगेर शंकास्पद अवस्थामा रहेका चिङ्गाड गाउँपालिका–४ निवासी ४७ वर्षीय ललित चन्दलाई नियन्त्रणमा लिन खोजेको थियो।

प्रहरीका अनुसार नियन्त्रणमा लिने क्रममा चन्दले प्रहरी टोलीमाथि हातपात तथा आक्रमण गर्दै ठूलो मात्रामा ब्राउनसुगरसहित भाग्ने प्रयास गरेका थिए। त्यसपछि लागूऔषध नियन्त्रण शाखा कार्यालय ब्युरो सुर्खेतबाट खटिएको टोलीले बल प्रयोगस्वरूप एक राउन्ड हवाई फायर गरी उनलाई नियन्त्रणमा लिएको हो।

नियन्त्रणपछि गरिएको खानतलासीमा उनको साथबाट शुद्ध ३७ ग्राम ७३० मिलिग्राम ब्राउनसुगर बरामद भएको प्रहरीले जनाएको छ।

पक्राउ परेका चन्दलाई जिल्ला प्रहरी कार्यालयमा ल्याई लागूऔषध सम्बन्धी मुद्दा दर्ता गरिएको छ। अदालतबाट म्याद थप गरी घटनाबारे थप अनुसन्धान भइरहेको प्रहरीले जनाएको छ।