अपहरण गरी होटलमा बन्धक बनाएको आरोपमा तीन जना पक्राउ

काठमाडौं । अपहरण तथा शरीर बन्धक कसूरमा संलग्न रहेको अभियोगमा प्रहरीले तीन जनालाई  पक्राउ गरेको छ।

पक्राउ पर्नेहरूमा काठमाडौं महानगरपालिका–१४ कलंकी बस्ने सुर्खेत वीरेन्द्रनगर नगरपालिका–५ घर भएका २६ वर्षीय फपेन्द्र न्यौपाने, जुम्ला तिला गाउँपालिका–८ घर भएका ३६ वर्षीय धनराज बस्नेत र कास्की माछापुच्छ्रे गाउँपालिका–७ घर भएका ४२ वर्षीय शिव बहादुर घर्ती रहेका छन्।

प्रहरीका अनुसार काठमाडौं महानगरपालिका–१२ टेकुस्थित शिव बहादुरले सञ्चालन गरेको रोडलाइन प्यालेस होटलमा पीडितलाई बन्धक बनाई कुटपिट गरी घाइते बनाएको भन्ने सूचनाको आधारमा काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई पक्राउ गरेको हो।

घटनामा संलग्न व्यक्तिहरूलाई नियन्त्रणमा लिनुका साथै प्रहरीले पीडितको सकुशल उद्धार गरेको जनाएको छ।

पक्राउ परेका तीनै जनालाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको प्रहरीले जनाएको छ।