१ करोड १६ लाख नगदसहित दुई हुण्डी कारोबारी पक्राउ

काठमाडौं । काठमाडौँमा अवैध हुण्डी कारोबारमा संलग्न रहेको आरोपमा प्रहरीले दुई जनालाई ठूलो रकमसहित पक्राउ गरेको छ। पक्राउ पर्नेमा नागार्जुन नगरपालिका–८ भीमढुङ्गाका २८ वर्षीय सागर गिरी र सोही स्थानका २८ वर्षीय प्रमोदप्रसाद धिताल रहेका छन्।

जिल्ला प्रहरी परिसर काठमाडौँको टोलीले गोप्य सूचनाका आधारमा भीमढुङ्गा क्षेत्रबाट उनीहरूलाई नियन्त्रणमा लिएको हो। पक्राउका क्रममा प्रहरीले उनीहरूको साथबाट रु एक करोड १६ लाख नगद बरामद गरेको जनाएको छ।

परिसरका प्रवक्ता प्रहरी उपरीक्षक पवनकुमार भट्टराईका अनुसार पक्राउ परेकाबाट तीन थान चेकबुक, विभिन्न व्यक्तिको नाममा काटिएको रु २७ लाख ३० हजार बराबरका चेक, चार थान विभिन्न बैंकका एटिएम कार्ड र एक थान नागरिकता फेला परेको छ। त्यस्तै दुई वटा चारपाङ्ग्रे र एउटा दुईपाङ्ग्रे सवारीसाधन, तीन थान सवारी दर्ता किताब पनि बरामद गरिएको प्रहरीले जनाएको छ।

यसका अतिरिक्त छ वटा मोबाइल फोन, एनसेल र नेपाल टेलिकमका गरी ३१ थान सिमकार्ड तथा एक थान कम्प्युटर समेत बरामद भएको प्रहरीले जानकारी दिएको छ।

पक्राउ परेका दुवै जनाविरुद्ध थप अनुसन्धानका लागि जिल्ला अदालत काठमाडौँबाट पाँच दिनको म्याद थप गरेर अनुसन्धान प्रक्रिया अघि बढाइएको प्रहरीले जनाएको छ।