आकर्षक तलबको प्रलोभनमा विदेश पठाइदिन्छु भन्दै २७ लाख ठगी गर्ने महिला पक्राउ

काठमाडौं । आकर्षक तलबको प्रलोभन देखाएर क्यानडा पठाइदिने भन्दै लाखौँ रुपैयाँ ठगी गरेको अभियोगमा प्रहरीले एक महिलालाई पक्राउ गरेको छ।

पक्राउ पर्नेमा काठमाडौं महानगरपालिका–९ बस्ने कञ्चनपुर भीमदत्त नगरपालिका–१८ घर भएकी ५१ वर्षीया गीता भण्डारी रहेकी छन्।

प्रहरीका अनुसार भण्डारीले क्यानडा पठाइदिने भन्दै पाँच जना पीडितबाट जम्मा २७ लाख रुपैयाँ लिई सम्पर्कविहीन भएकी थिइन्। पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले उनलाई  काठमाडौं महानगरपालिका–९ बाट पक्राउ गरेको हो।

पक्राउ परेकी भण्डारीलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।