सुर्खेतकी इनिशा विक हत्या प्रकरण: निष्पक्ष अनुसन्धान छिट्टै निष्कर्षमा पुग्ने प्रहरी प्रमुखको विश्वास

काठमाडौं । प्रहरी प्रमुख (आईजीपी) दानबहादुर कार्कीले सुर्खेतमा भएको इनिशा विक हत्या प्रकरणको अनुसन्धान तथ्य र प्रमाणका आधारमा अघि बढिरहेको बताएका छन्।

अन्तर्राष्ट्रिय जाति तथा रंगभेद उन्मूलन दिवसका अवसरमा काठमाडौंमा आयोजित कार्यक्रममा बोल्दै आईइजीपी कार्कीले कानुनको पूर्ण पालना गर्दै निष्पक्ष अनुसन्धान भइरहेको स्पष्ट पारेका छन् ।

उनका अनुसार कुनै पनि घटनामा स्थानभन्दा पनि पीडितको अवस्था र न्यायको सुनिश्चितता महत्वपूर्ण हुने भएकाले अनुसन्धान त्यही आधारमा केन्द्रित गरिएको छ। उनले पीडित पक्षको आवाज निरन्तर सुन्ने र त्यसलाई सम्बोधन गर्ने प्रतिबद्धता पनि जनाए।

प्रहरीले पीडित परिवारसँग निरन्तर सम्पर्कमा रही घटनाको सत्य तथ्य पत्ता लगाउन आवश्यक जनशक्ति परिचालन गरेको कार्कीले बताए। यसै कारण छिट्टै अनुसन्धानको निष्कर्ष सार्वजनिक हुने विश्वास व्यक्त गरिएको कार्कीले बताए ।

त्यसैगरी उनले सबै नागरिकले समान अधिकार पाउनुपर्नेमा जोड दिँदै कुनै पनि प्रकारको विभेदविरुद्ध कानुनअनुसार कडाइका साथ कारबाही अघि बढाइने बताए।