कल्भर्टमुनि तन्नामा बेरिएको महिलाको शव: हत्या गरेर फालेको खुलासा, श्रीमान् पक्राउ

काठमाडौं । एक महिलाको शव फेला परेपछि गरिएको अनुसन्धानले घटनाको रहस्य विस्तारै खुल्दै गएको छ। मंगलबार साँझ विराटनगर–१७ स्थित एक कल्भर्टमुनि तन्नाले बेरिएको अवस्थामा भेटिएको शवको पहिचान भएपछि घटनाले नयाँ मोड लिएको प्रहरीले जानकारी दिएको छ। 

प्रहरीले दिएको जानकारी अनुसार उक्त शव विराटनगर–१५ की कोमलकुमारी साहको रहेको पुष्टि भएको छ। उनी केही दिनदेखि सम्पर्कबिहीन थिइन्। कोमल हराएको भन्दै उनका श्रीमान् रोशन साहले नै प्रहरीमा उजुरी दिएका थिए।

जिल्ला प्रहरी कार्यालय मोरङका डीएसपी लिलाराज लामिछानेका अनुसार कोमल हराएको निवेदन र शवको विवरण मिलान गर्दा मृतकको पहिचान गर्न सहज भएको हो। यससँगै प्रहरीले शंकाको घेरामा परेका श्रीमान् रोशनलाई नियन्त्रणमा लिएर थप अनुसन्धान अघि बढाएको जनाएको छ।

प्रारम्भिक अनुसन्धानले घटनाको पृष्ठभूमिमा घरायसी विवाद रहेको संकेत गरेको छ। प्रहरी स्रोतका अनुसार रोशनले विवादकै क्रममा श्रीमतीको हत्या गरेर शव लुकाउने प्रयास गरेको  देखिएको छ। मृतकको शव तन्नामा बेरिएको अवस्थामा घरबाट करिब ५ किलोमिटर टाढा लगेर फालिएको थियो। 

कोमल चैत ६ गतेदेखि बेपत्ता थिइन् भने चैत ८ गते उनका श्रीमानले प्रहरीमा निवेदन दिएका थिए। त्यसको दुई दिनपछि स्थानीयले दुर्गन्ध आएको महसुस गरेपछि कल्भर्टमुनि शव देखेका थिए र जनप्रतिनिधिमार्फत प्रहरीलाई खबर गरिएको थियो।

शवको अवस्था अत्यन्त बिग्रिएको हुँदा पहिचानमा सुरुवाती कठिनाइ भएको प्रहरीले जनाएको छ। हाल शव पोस्टमार्टमका लागि कोशी अस्पतालमा राखिएको छ भने घटनाबारे विस्तृत अनुसन्धान जारी रहेको प्रहरीले बताएको छ।