अमेरिका र युरोप पठाउने भन्दै लाखौं रुपैयाँ ठगी गर्ने गिरोहका ४ जना पक्राउ

काठमाडौं । वैदेशिक रोजगारीमा आकर्षक तलबको प्रलोभन देखाएर विभिन्न देश पठाइदिने भन्दै लाखौं रुपैयाँ ठगी गरेको आरोपमा चार जनालाई प्रहरीले पक्राउ गरेको छ।

पक्राउ पर्नेहरूमा काठमाडौंको टोखा नगरपालिका–३ बस्दै आएका कास्कीको रूपा गाउँपालिका–५ घर भएका ३६ वर्षीय बिकल पौडेल, काठमाडौंको तारकेश्वर नगरपालिका–१६ बस्ने रूकुम पूर्वको पुथा उत्तरगंगा गाउँपालिका–१२ घर भएका ४२ वर्षीय धनिराम बुढा, काठमाडौंकै टोखा नगरपालिका–१० बस्ने गुल्मीको कालीगण्डकी गाउँपालिका–६ घर भएका ३७ वर्षीय काशिराम दर्जी तथा काठमाडौंको टोखा नगरपालिका–८ बस्ने नुवाकोटको शिवपुरी गाउँपालिका–५ घर भएकी २५ वर्षीया सरस्वती भण्डारी रहेका छन्।

प्रहरीका अनुसार बिकलले क्यानडा पठाइदिने भन्दै एक जनाबाट १० लाख रुपैयाँ, धनिरामले अमेरिका पठाइदिने भन्दै एक जनाबाट १८ लाख रुपैयाँ, काशिरामले क्रोएशिया पठाइदिने भन्दै तीन जनाबाट ३ लाख २० हजार रुपैयाँ तथा सरस्वतीले रोमानिया पठाइदिने भन्दै एक जनाबाट १ लाख ४६ हजार रुपैयाँ ठगी गरेका थिए। रकम लिइसकेपछि उनीहरू सम्पर्कविहीन भएको पीडितहरूको उजुरी छ।

उक्त उजुरीका आधारमा काठमाडौं उपत्यका अपराध अनुसन्धान कार्यालय टेकुको टोलीले उनीहरूलाई विभिन्न स्थानबाट पक्राउ गरेको हो।

पक्राउ परेकाहरूलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।