प्रहरीको लाठीचार्ज!

काठमाडौं । माइतीघर–बबरमहल क्षेत्रमा प्रहरी र प्रदर्शनकारीबीच शनिबार झडप भएको छ। नेकपा एमालेका कार्यकर्ताहरूले पार्टी अध्यक्ष केपी शर्मा ओलीको पक्राउको विरोधमा प्रदर्शन गर्दै सडकमा उत्रिएका थिए।

प्रदर्शनकारीहरू माइतीघर मण्डलाबाट नयाँ बानेश्वरतर्फ अघि बढ्न खोज्दा प्रहरीले बबरमहलस्थित काठमाडौं जिल्ला अदालत अगाडि रोक्न प्रयास गरेको थियो। सोही क्रममा स्थिति तनावपूर्ण बन्दै गएपछि दुवै पक्षबीच झडप भएको हो।

झडप उग्र बन्दै जाँदा प्रहरीले भीड नियन्त्रणका लागि लाठीचार्ज गरेको छ भने प्रदर्शनकारीहरूले प्रहरीमाथि ढुंगा प्रहार गरेका छन्। घटनास्थल वरपर अहिले पनि तनाव कायम रहेको छ र सुरक्षा व्यवस्था कडा पारिएको प्रहरीले जनाएको छ।

प्रहरीले थप क्षति हुन नदिन अवस्था नियन्त्रणमा लिन प्रयास जारी राखेको छ।