नेपालगन्जबाट काठमाडौं आउँदै गरेको बसले भ्यान र ट्रकलाई ठक्कर दिंदा १२ जना घाइते

काठमाडौं । पूर्व–पश्चिम राजमार्ग अन्तर्गत नवलपरासी (बर्दघाट–सुस्तापूर्व) को गैँडाकोट क्षेत्रमा तीन सवारीसाधन आपसमा ठोक्किँदा १२ जना घाइते भएका छन्।

गैँडाकोट नगरपालिका–९ स्थित हनुमान मन्दिर नजिक सोमबार बिहान दुर्घटना भएको हो। नेपालगन्जबाट काठमाडौँतर्फ आइरहेको लु प्र ०१–००१ ख ०९१० नम्बरको बसले विपरीत दिशाबाट आउँदै गरेको बा प्र ०१–०२८ च ५००४ नम्बरको पिकअप भ्यान र सोही दिशामा गुडिरहेको बा ३ ख ३१६३ नम्बरको ट्रकलाई ठक्कर दिएको जिल्ला प्रहरी कार्यालयले जनाएको छ।

दुर्घटनामा ट्रक चालक रामेछाप खाँडादेवी गाउँपालिका–४ का ३२ वर्षीय इन्द्र तामाङ, पिकअप चालक चितवन भरतपुर महानगरपालिका–१२ का ३३ वर्षीय दर्शन काप्री तथा बस चालक बाँके नेपालगन्ज उपमहानगरपालिका–२० का ४१ वर्षीय मोहनसिंह बलामी मगर घाइते भएका छन्।

यसबाहेक बसमा सवार अन्य नौ जना यात्रु पनि सामान्य घाइते भएका प्रहरीले जानकारी दिएको छ।

घाइते सबैलाई उपचारका लागि चितवन पठाइएको छ भने दुर्घटनापछि केहीबेर अवरुद्ध भएको यातायात अहिले सामान्य अवस्थामा फर्किएको छ।