९८ ग्राम बढी खैरो हेरोइन र साढे ६ लाख नगदसहित एक युवक पक्राउ

काठमाडौं। लागुऔषध नियन्त्रण ब्युरोले ठूलो परिमाणमा खैरो हेरोइन र लाखौं रुपैयाँसहित  एक युवकलाई नियन्त्रणमा लिएको छ।

काठमाडौंको तारकेश्वर नगरपालिका–८ स्थित एक डेराबाट प्रहरीले नुवाकोटको बेलकोटगढी नगरपालिका–७ घर भएका २८ वर्षीय उमेश राईलाई बिहीबार पक्राउ गरेको हो।

ब्युरोका अनुसार राईको कोठाबाट ९८ ग्राम ७१० मिलिग्राम खैरो हेरोइन र  नगद ६ लाख ५० हजार रुपैयाँ बरामद गरिएको हो। उनी केही समयदेखि तारकेश्वर क्षेत्रमा बस्दै आएका थिए।

प्रहरीले उनलाई लागुऔषध सम्बन्धी कसुरमा नियन्त्रणमा लिएर लागुऔषध नियन्त्रण ऐन, २०३३ अनुसार अदालतबाट म्याद थप गरी थप अनुसन्धान अघि बढाएको जनाएको छ।