साढे १७ करोड बढीको क्रिप्टो कारोबार प्रकरणमा चिनियाँ नागरिक पक्राउ

काठमाडौं । सामाजिक सञ्जाल प्रयोग गरेर ठगी तथा साढे १७ करोड बढीको अवैध क्रिप्टोकरेन्सी कारोबारमा संलग्न एक चिनियाँ नागरिक पक्राउ परेका छन्। प्रहरीले ठमेल क्षेत्रबाट ३५ वर्षीय झु यी फेङलाई नियन्त्रणमा लिएको हो।

जिल्ला प्रहरी परिसर काठमाडौँका अनुसार उनले सामाजिक सञ्जालमार्फत नेपाली नागरिकहरूसँग चिनजान बढाउँदै विभिन्न प्रलोभन देखाएर विश्वास जित्ने गर्थे। त्यसपछि उनीहरूकै बैंक खाताहरू प्रयोग गरी ठगीबाट संकलित रकम उठाउने र उक्त रकमलाई क्रिप्टोकरेन्सीमा रूपान्तरण गरेर कारोबार गर्ने गरेको प्रारम्भिक अनुसन्धानबाट खुलेको छ।

प्रहरीले उनको गतिविधिसम्बन्धी विवरण जाँच गर्दा करिब १७ करोड ७९ लाख रुपैयाँभन्दा बढी बराबरको क्रिप्टोकरेन्सी कारोबार भएको तथ्य फेला पारेको जनाएको छ। साथै, उनको साथबाट तीनवटा मोबाइल फोन र रकम पठाउन प्रयोग गरिने ‘इन्टरनेशनल एक्सप्रेस’ लेखिएका कागजातहरू पनि बरामद गरिएको छ।

प्रहरी उपरीक्षक पवन कुमार भट्टराईका अनुसार पक्राउ परेका फेङलाई काठमाडौँ जिल्ला अदालतबाट पाँच दिनको म्याद थप गरी थप अनुसन्धान भइरहेको छ। यस घटनामा अन्य व्यक्तिहरूको संलग्नता रहेको हुन सक्ने आशंकामा अनुसन्धान जारी रहेको प्रहरीले जनाएको छ।

नेपालमा क्रिप्टोकरेन्सी कारोबार गैरकानुनी भएकाले यस प्रकारका गतिविधिमा संलग्न व्यक्तिहरूमाथि कडा कारबाही हुने प्रावधान छ।