दाङमा १७ वर्षीय किशोरको हत्या: फेक आइडीमार्फत बोलाएर योजनाबद्ध हत्या, तीन पक्राउ

दाङ ।  दाङको राप्ती गाउँपालिकामा १७ वर्षीय किशोरको  हत्या आरोपमा प्रहरीले तीन जनालाई पक्राउ गरेको छ। गाउँपालिका-२ बह्राखुट्टीका १७ बर्षीय स्मिथ प्रधानको हत्या भएको प्रहरीले जानकारी दिएको छ। 

प्रधानको शब राप्ती गाउँपालिका–४ दोलाई खोलाको सुख्खा पक्की नालामा टाउकोमा चोट ग्रस्त अवस्थामा शुक्रबार दिउँसो १२ तिर फेला परेको प्रहरीले जनाएको छ।  उक्त घटनामा प्रधानका साथी राप्ती गाउँपालिका– १ पाखापानीका १६ बर्षीय आयुषमान थापा मगर घाइते छन् । राप्ती आधारभूत अस्पताल सिसहनियाँमा उपचारपछि थप उपचारका लागि उनलाई बुटवल रिफर गरिएको छ ।

हत्या आरोपमा प्रहरीले बंगलाचुली गाउँपालिकाका निवासी २० बर्षीय संदिप वली, राप्ती गाउँपालिकाका १८ बर्षीय निश्चल चौधरी र राप्ती गाउँपालिकाकै १८ बर्षीया आकृति बुढालाई पक्राउ गरेको जनाएको छ। 

हत्या आरोपीहरुलाई शुक्रबार  राति १० बजेदेखि शनिबार बिहान ४ बजेको बीचमा बिभिन्न स्थानबाट पक्राउ गरिएको प्रहरीले जानकारी दिएको छ। प्रहरीका  अनुसार आकृति बुढाले फेक आइडी बनाएर भेट्न आउनका लागि आयुषमान र  प्रधानलाई रातिमा बोलाएकी थिइन । उनीले बोलाएको हुँदा प्रधान र आयुषमान बिहीबार बेलुकी ८ बजेतिर घर बाटसंगै राप्ती गाउँपालिका – ४ तर्फ निस्किएका थिए ।

बुढाकै योजनामा भेट्न बोलाएर योजनाबद्ध रुपमा प्रधानको हत्या गरेको तथ्य खुलेको प्रहरीले जनाएको छ । प्रहरीका अनुसार प्रहरी हिरासतमा रहेकी आकृति बुढा र हत्या गरिएका प्रधानले बिगतमा कक्षा ८ देखि १० सम्मसंगै पढेका थिए ।

सामाजिक संजालको गलत प्रयोग, कलिलै उमेरको प्रेम सम्बन्ध र बदलाको भावनाका कारण घटना भएको देखिएको प्रहरीले जानकारी दिएको छ भने घटनाका बारेमा अनुसन्धान प्रक्रिया अगाडि बढाइएको छ।