पूर्वमन्त्री दीपक खड्कालाई थप ७ दिन हिरासतमा राख्न अदालतको अनुमति

काठमाडौं । नेपाली कांग्रेसका नेता तथा पूर्वमन्त्री दीपक खड्कालाई सम्पत्ति शुद्धीकरण सम्बन्धी अनुसन्धानका लागि थप सात दिन हिरासतमा राख्न काठमाडौं जिल्ला अदालतले अनुमति दिएको छ।

सम्पत्ति शुद्धीकरण अनुसन्धान विभागले खड्काविरुद्ध चलिरहेको मुद्दामा अनुसन्धान गरिरहेको छ। यसअघि पनि अदालतले उनलाई सात दिनसम्म हिरासतमा राखेर अनुसन्धान गर्न स्वीकृति दिएको थियो।

पूर्व ऊर्जा, जलस्रोत तथा सिँचाइमन्त्री समेत रहेका खड्कालाई नेपाल प्रहरीको केन्द्रीय अनुसन्धान ब्युरो (सीआईबी)ले गत आइतबार बिहान पक्राउ गरेको हो।

गत भदौमा भएको ‘जेनजी आन्दोलन’का क्रममा प्रदर्शनकारीहरूले खड्काको घरमा तोडफोड गर्नुका साथै आगजनी गरेका थिए। त्यसपछि सामाजिक सञ्जालमा उनको घरमा नेपाली र विदेशी नोट जलेको दृश्य सार्वजनिक भएको थियो।

उक्त घटनापछि खड्काको घरमा भेटिएको जलेको रकमको स्रोतबारे विभागले अनुसन्धान अघि बढाएको छ। अनुसन्धानका क्रममा जलेका नोटका अवशेष र वरपरको खरानी समेत संकलन गरिएको बताइएको छ।