लोक सेवा पास गराइदिने भन्दै ठगी गर्ने पवन पक्राउ, खातामा करोडौँ रकम जम्मा

सुर्खेत। प्रहरीले लोक सेवा आयोग तथा अन्य प्रतिस्पर्धात्मक परीक्षामा उत्तीर्ण गराइदिने प्रलोभन देखाएर ठूलो रकम ठगी गर्ने एक व्यक्तिलाई पक्राउ गरेको छ। पक्राउ पर्नेमा दैलेखको भगवतिमाई गाउँपालिका–७ स्थायी घर भई हाल वीरेन्द्रनगर नगरपालिका–१२ मा बस्दै आएका २२ वर्षीय पवन विक रहेका छन्।

जिल्ला प्रहरी कार्यालय सुर्खेतका अनुसार जैसरा थापाले दिएको उजुरीका आधारमा उनलाई नियन्त्रणमा लिइएको हो। प्रहरी नायव उपरीक्षक मोहनजंग बुढ्थापाका अनुसार उक्त व्यक्तिले लोक सेवा, प्रहरी लगायतका परीक्षामा लिखित तथा अन्तर्वार्ता पास गराइदिने आश्वासन दिँदै सर्वसाधारणबाट रकम असुल्दै आएको खुलेको छ।

प्रहरीले मंगलबार खोजी अभियानका क्रममा उनलाई वीरेन्द्रनगर नगरपालिका–६ क्षेत्रमा लुकिरहेको अवस्थामा फेला पारेको जनाएको छ। हाल उनीविरुद्ध ठगीसम्बन्धी मुद्दामा अनुसन्धान भइरहेको छ।

प्रहरीका अनुसार अहिलेसम्म एक जनाको मात्रै उजुरी दर्ता भए पनि थप धेरै व्यक्तिहरू पीडित भएको आशंका गरिएको छ। उनीहरूलाई सम्पर्कमा ल्याउने प्रयास भइरहेको बताइएको छ।

प्रारम्भिक अनुसन्धानबाट पवन विकको बैंक खातामा करोडभन्दा बढी रकम जम्मा भएको देखिएको छ, जसले ठगीको दायरा ठूलो रहेको संकेत गर्दछ। यस सम्बन्धमा थप अनुसन्धान जारी रहेको प्रहरीले जनाएको छ।