बढैयाताल गाउँपालिका क्षेत्रबाट खैरो हेरोइनसहित दुई युवक पक्राउ

बर्दिया । बर्दियाको बढैयाताल गाउँपालिका क्षेत्रबाट प्रहरीले खैरो हेरोइनसहित दुई युवकलाई पक्राउ गरेको छ।

जिल्ला प्रहरी कार्यालय बर्दियाका अनुसार चौकी कालिकाबाट खटिएको टोलीले भारतदेखि नेपालतर्फ पैदल आउँदै गरेको अवस्थामा बढैयाताल गाउँपालिका-७ कण्ठपुर चेकपोष्टबाट ठाकुरबाबा नगरपालिका-५ बस्ने ३६ वर्षीय पवन श्रेष्ठ र सोही स्थानकै ३० वर्षीय प्रविन कुमार थारुलाई ७१० मिलिग्राम खैरो हेरोइनसहित पक्राउ गरेको हो।

नाका नजिक चेकजाँचका क्रममा उनीहरुको साथम रहेको तरकारीभित्र लुकाइछिपाई राखिएको निलो रंगको प्लास्टिकमा बाँधिएको १ पुडिया ७१० मिलिग्राम खैरो हेरोइन बरामद गरिएको जिल्ला प्रहरी कार्यालय बर्दियाले जनाएको छ।

शनिबार राति पक्राउ परेका दुबै जनालाई इलाका प्रहरी कार्यालय मैनापोखरले थप अनुसन्धान अगाडि बढाएको र आज बर्दिया जिल्ला अदालतबाट म्याद थप गरिने प्रहरीले जनाएको छ।