बाँकेमा प्रहरीको अवैध उत्खनन् र भन्सार छलिविरुद्धको कारबाही तीव्र!

बाँके।  जिल्लाका विभिन्न स्थानबाट बाँके  प्रहरीले अवैध क्रियाकलाप विरुद्ध निगरानी बढाउँदै कारबाहीलाई तीव्रता दिएको छ। प्रहरीको कारबाहीमा कोहलपुर नगरपालिका–७ प्रसादीपुर क्षेत्रबाट अवैध रूपमा बालुवा उत्खनन् तथा ढुवानीमा संलग्न तीन वटा ट्याक्टरलाई प्रहरीले नियन्त्रणमा लिएको छ।

इलाका प्रहरी कार्यालय कोहलपुरबाट खटिएको प्रहरी टोलीले ती सवारी साधन नियन्त्रणमा लिई आवश्यक कारबाहीका लागि सोमबार नै सम्बन्धित निकायमा बुझाएको थियो। उक्त ट्याक्टरहरूलाई जनही जरिवाना गरी जम्मा ९ हजार रुपैयाँ असुल गरिएको प्रहरीले जनाएको छ।

यसैबीच, जिल्लाको नेपालगञ्ज उपमहानगरपालिका–१० क्षेत्रबाट भन्सार छलि गरी ल्याइएका विभिन्न सामानहरू पनि बरामद गरिएको छ। प्रहरीले फलफूल, लत्ताकपडा, खाद्यान्न, कस्मेटिक तथा हार्डवेयरका सामानहरू सहित करिब ८ लाख ४५ हजार ६६० रुपैयाँ बराबरको सामग्री नियन्त्रणमा लिएको जनाएको छ।

बरामद गरिएका सबै सामानहरू आवश्यक कारबाहीका लागि सोमबार  भन्सार कार्यालय, नेपालगञ्ज पठाइएको प्रहरीले जानकारी दिएको छ।

प्रहरीले अवैध उत्खनन्, तस्करी तथा भन्सार  छलि जस्ता गतिविधि नियन्त्रण गर्न आगामी दिनमा पनि कडाइका साथ लाग्ने  जनाएको छ।