क्यासिनोमा प्रहरीको छापा, १९ जना नेपाली पक्राउ

भैरहवा । प्रहरीले  क्यासिनोमा छापा मारेर १९ जना नेपालीलाई नियन्त्रणमा लिएको छ। भैरहवास्थित  गौतमबुद्ध अन्तर्राष्ट्रिय विमानस्थल नजिक रहेको गौतमबुद्ध इन्टरनेसनल होटलभित्र सञ्चालन भइरहेको रोयल कालिङ्गा क्यासिनोमा नेपालीहरू गैरकानुनी रूपमा जुवा खेलिरहेको सूचनापछि प्रहरीले छापा मारेको थियो।

लुम्बिनी प्रदेश प्रहरी कार्यालय र जिल्ला प्रहरी कार्यालय रुपन्देहीको संयुक्त टोलीले गए राति उक्त क्यासिनोमा निगरानी तथा चेकजाँच गर्दा जुवा खेल्ने र सञ्चालनमा संलग्न व्यक्तिहरूलाई पक्राउ गरेको जनाएको छ। पक्राउ पर्नेमा जुवा खेलाउने ४ जना र खेलिरहेका १५ जना रहेको प्रहरीले पुष्टि गरेको छ।

प्रहरीका अनुसार उनीहरूबाट ९५ हजार ५ सय रुपैयाँ नगद, १७ वटा मोबाइल फोन र करिब २०० वटा क्यासिनो क्वाइन बरामद गरिएको छ।

नियन्त्रणमा लिइएकामध्ये अधिकांश १५ जना रुपन्देही जिल्लाकै रहेका छन् भने अन्य व्यक्तिहरू काठमाडौं, ललितपुर, गुल्मी र पर्सा जिल्लाबाट आएका रहेका छन्।

घटनाबारे थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ।