राप्रपाका वरिष्ठ उपाध्यक्ष विक्रम पाण्डेलाई धरौटीमा छाड्न आदेश

काठमाडौं । काठमाडौं जिल्ला अदालतले ई–बिडिङ प्रकरणमा राष्ट्रिय प्रजातन्त्र पार्टी (राप्रपा) वरिष्ठ उपाध्यक्ष तथा पूर्वमन्त्री विक्रम पाण्डेसहित ११ जनालाई धरौटीमा रिहा गर्न आदेश दिएको छ। अदालतले पाण्डेसँग ४ लाख रुपैयाँ धरौटी माग गरेको हो।

यसै प्रकरणमा प्रकाश ढुंगाना र सञ्जय भट्टसँग जनही १० लाख रुपैयाँ धरौटी मागिएको छ। त्यस्तै जीवनकुमार दाससँग ५ लाख, अमृत बोहरासँग ४ लाख, सागर कटुवालसँग ५ लाख, अनिल श्रेष्ठसँग ४ लाख तथा भाष्करराज अर्यालसँग १० लाख रुपैयाँ धरौटी लिएर रिहा गर्न आदेश भएको अदालत स्रोतले जनाएको छ।

मुद्दामा आरोपित सरकारी कर्मचारी दिवाकर देउजालाई भने पुर्पक्षका लागि कारागार पठाउन अदालतले आदेश दिएको छ।

यो प्रकरणमा सरोज दाहाल, शान्तकुमार श्रेष्ठ, कृष्णबहादुर खत्री, निरञ्जन खनाल, इन्द्रबहादुर बोहोरा, ज्योति सुवेदी, सुजन अधिकारी, भरत धामी, राहुलजंग कार्की र नारायणप्रसाद सिटिखु प्रतिवादी बनाइएका छन्। उनीहरू हाल फरार रहेको जनाइएको छ।

नेपाल प्रहरी केन्द्रीय अनुसन्धान ब्युरो (सीआईबी) को अनुसन्धान प्रतिवेदनका आधारमा गत वैशाख २५ गते सरकारी वकिल कार्यालयले सम्बन्धित व्यक्तिविरुद्ध मुद्दा दायर गरेको थियो।

पूर्वमन्त्री पाण्डेलगायतमाथि सरकारी वकिल कार्यालयले सङ्गठित अपराधसम्बन्धी मुद्दाबाट उन्मुक्ति दिएको आरोप लगाइएको छ। यस प्रकरणमा कुल २२ जनाविरुद्ध मुद्दा दर्ता गरिएकामा १० जना अझै फरार रहेका छन्।