बाँकेबाट ठुलो परिमाणमा अफिम र चरेससहित एक जना सशस्त्र प्रहरीको नियन्त्रणमा

बाँके ।सशस्त्र प्रहरी बल नेपाल नं.३० गण, हेडक्वार्टर बागेश्वरी बाँकेको सक्रियतामा ठूलो परिमाणमा लागूऔषध बरामद गर्दै एक जनालाई पक्राउ गरेको छ।

सीमा सुरक्षालाई थप सुदृढ बनाउने अभियानअन्तर्गत गणपति (गण प्रमुख) को प्रत्यक्ष निर्देशन र विशेष निगरानीमा सञ्चालन गरिएको सुरक्षा अभियानका क्रममा उक्त सफलता हासिल भएको हो। पछिल्ला केही दिनदेखि सीमा क्षेत्रमा चोरी–तस्करी, लागूऔषध ओसारपसार तथा अन्य अवैध गतिविधि नियन्त्रण गर्न विशेष अभियान सञ्चालन हुँदै आएको छ।

सोही अभियानअन्तर्गत आज गण मातहत रहेको बिओपी कालाबन्जरबाट खटिएको सशस्त्र प्रहरी निरीक्षक योगेन्द्र बहादुर शाहीको कमाण्डको टोलीले नेपालगञ्ज उपमहानगरपालिका–१५ पिपराहा सीमा क्षेत्रमा चेकजाँच गर्ने क्रममा करिब साढे ५ किलो अफिम र ५ ग्राम चरेस बरामद गरेको सशस्त्र प्रहरी बाँकेले जनाएको छ।

बरामद लागूऔषधसहित एक जनालाई पक्राउ गरी आवश्यक अनुसन्धान तथा कानुनी कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ।

सशस्त्र प्रहरी बल नेपाल नं.३० गणले सीमा सुरक्षालाई प्रभावकारी, प्रविधिमैत्री र परिणाममुखी बनाउन गणपति नेतृत्वमा विशेष सक्रियता देखाउँदै आएको छ। पछिल्ला दिनहरूमा चोरी–तस्करी नियन्त्रण, लागूऔषध बरामद तथा सीमा अपराध न्यूनीकरणमा हासिल भएका उपलब्धिहरूले संगठनको प्रतिबद्धता र कार्यकुशलता थप पुष्टि गरेको छ।

सशस्त्र प्रहरी बल नेपालले सीमा क्षेत्रमा हुने सबै प्रकारका अवैध गतिविधि नियन्त्रण गर्दै शान्ति, सुरक्षा र कानूनी शासन कायम गर्न यस्ता अभियानलाई अझ प्रभावकारी रूपमा निरन्तरता दिने जनाएको छ।