सल्यानमा डीएसपी पातली यक्सनमा: १२ वर्षपछि फरार प्रतिवादी पक्राउ,अवैध उत्खननविरुद्ध कडाइ

सल्यान।  प्रहरी नायब उपरीक्षक (डीएसपी) दिपक पातलीको नेतृत्वको सल्यान प्रहरी यक्सनमा आउँदै १२ वर्षपछि जबरजस्ती करणी मुद्दामा फरार रहेका प्रतिवादीलाई पक्राउ गर्न सफल भएको छ।

जिल्ला प्रहरी कार्यालय सल्यानका अनुसार अदालतबाट कैद सजाय तोकिएपछि फरार रहेका त्रिवेणी गाउँपालिका–८ का अन्दाजी २९ वर्षीय सुबास वली उर्फ कुमार बिकलाई  १२ वर्षपछि पक्राउ गरिएको हो।

सल्यान जिल्ला अदालतको लगत नं. ५९९ मिति २०७० चैत २३ गते तथा मिति २०७० चैत २३ गतेको दाङ जिल्ला अदालतको फैसला आदेशअनुसार ५ वर्ष ५ महिना ८ दिन कैद सजाय तोकिएका कुमार बिकलाई इलाका प्रहरी कार्यालय लुहामबाट खटिएको प्रहरी टोलीले इलाका प्रहरी कार्यालय तुलसीपुर, दाङको सहयोगमा तुलसीपुर उपमहानगरपालिका–५ बसपार्क क्षेत्रबाट जेठ ११ गते पक्राउ गरेको थियो ।

पक्राउ परेका कुमार बिकलाई आज आवश्यक कारबाहीका लागि सल्यान जिल्ला अदालतमा बुझाइएको सल्यान प्रहरीले जनाएको छ।

यसैबीच, सल्यानको शारदा नगरपालिका–१ स्थित शारदा खोलाबाट अवैध रूपमा बालुवा उत्खनन् तथा ढुवानी गरिरहेको अवस्थामा एउटा  एक्साभेटर र एक ट्र्याक्टरलाई प्रहरीले नियन्त्रणमा लिएको छ।

जिल्ला प्रहरी कार्यालय सल्यान तथा इलाका प्रहरी कार्यालय सितलपाटीबाट खटिएको संयुक्त प्रहरी टोलीले जेठ ११ गते ती सवारी साधन नियन्त्रणमा लिई थप कारबाहीका लागि सम्बन्धित निकायमा बुझाएको जनाएको छ।

डीएसपी  पातलीले सल्यान प्रहरीको नेतृत्व सम्हालेपछि अपराध नियन्त्रण, लागुऔषध नियन्त्रण तथा अवैध गतिविधिविरुद्ध प्रहरी सक्रियता व्यापक रुपमा बढाइएको देखिएको छ। डीएसपी पातली केहीदिन अघि जिल्ला प्रहरी कार्यालय बाँकेबाट जिल्ला प्रहरी कार्यालय सल्यानको प्रहरी प्रमुखमा सरुवा भएर गएका थिए।

आज सल्यान प्रमुख पातलीले जिल्लाका पत्रकारहरुसँग परिचयात्मक कार्यक्रम गरेको जिल्ला प्रहरी कार्यालय सल्यानले जानकारी दिएको छ।