चोरी मुद्दामा सुर्खेत प्रहरीको हिरासतमा रहेका थुनुवाको मृत्यु

सुर्खेत । मोबाइल चोरी मुद्दामा पक्राउ परेर प्रहरी हिरासतमा रहेका एक थुनुवाको मृत्यु भएको छ। वीरेन्द्रनगर नगरपालिका–१० निवासी २१ वर्षीय सबीर बक्सको उपचारका क्रममा मृत्यु भएको प्रहरीले जनाएको छ।

मोबाइल चोरी सम्बन्धी मुद्दामा उनी जेठ २७ गतेदेखि प्रहरी हिरासतमा थिए। शुक्रबार हिरासतमा रहँदा अचानक स्वास्थ्य अवस्था बिग्रिएपछि उनलाई अपराह्न ४ बजे कर्णाली प्रदेश अस्पताल पुर्‍याइएको थियो।

जिल्ला प्रहरी कार्यालय सुर्खेतका प्रवक्ता तथा प्रहरी नायव उपरीक्षक कविन्द्रसिंह बोहोराका अनुसार अस्पतालमा उपचाररत बक्सलाई शनिबार बिहान ५ः३२ बजे चिकित्सकले मृत घोषणा गरेका हुन्।

घटनापछि शव परीक्षणका लागि बाँकेबाट फरेन्सिक चिकित्सक ल्याउने प्रक्रिया अघि बढाइएको प्रहरीले जनाएको छ। पोस्टमार्टम प्रतिवेदन आएपछि मात्रै मृत्युको कारणबारे थप जानकारी प्राप्त हुने बताइएको छ।

प्रहरीका अनुसार बक्स यसअघि पनि विभिन्न चोरीका घटनामा संलग्न रहेको र लागुऔषध प्रयोगकर्ता समेत थिए।