तीन दिनदेखि सम्पर्कविहीन पूर्वनगरप्रमुख सिंहको खोजीमा प्रहरी, जंगलमा ड्रोनदेखि ‘के–नाइन’सम्म परिचालन

कपिलवस्तु । कपिलवस्तु नगरपालिकाका पूर्वनगरप्रमुख किरण सिंह हराएको तेस्रो दिनसम्म पनि उनको अवस्था पत्ता लाग्न सकेको छैन। ढेकरी जंगल क्षेत्रमा हराएका सिंहको खोजीका लागि प्रहरीले ठूलो संख्यामा सुरक्षाकर्मी परिचालन गर्नुका साथै ड्रोन र तालिमप्राप्त कुकुरको समेत प्रयोग गरिरहेको छ।

बुद्धभूमि नगरपालिका क्षेत्रमा पर्ने ढेकरी जंगलमा शुक्रबारदेखि खोजी अभियान चलिरहेको हो। भैरहवास्थित गौतमबुद्ध अन्तर्राष्ट्रिय विमानस्थलको ‘के–नाइन’ शाखाबाट तालिमप्राप्त कुकुर झिकाएर जंगलका सम्भावित क्षेत्रमा खोजी गरिएको थियो। त्यसैगरी ड्रोनबाट पनि जंगलको निगरानी गरिएको प्रहरीले जनाएको छ। हालसम्म भने सिंहको अवस्थाबारे कुनै भरपर्दो संकेत भेटिएको छैन।

सिंह शुक्रबार कृषि फर्म सञ्चालनका लागि भइरहेको कामको निरीक्षण गर्न ढेकरी जंगल पुगेका थिए। स्थानीयका अनुसार छोटो बाटो प्रयोग गरेर गन्तव्यतर्फ जाने क्रममा उनी जंगलभित्र बाटो बिराएको हुन सक्ने देखिएको छ।

जंगलमा अलमलिएपछि सिंहले शुक्रबार साँझ करिब ५ः३० बजेसम्म विभिन्न व्यक्तिसँग मोबाइलमा कुराकानी गरेका थिए। त्यसपछि भने उनको फोन सम्पर्कविहीन बनेको थियो। राति करिब १ बजेसम्म मोबाइलमा घण्टी गए पनि फोन नउठेको र त्यसपछि मोबाइलमा समेत सम्पर्क हुन नसकेको प्रहरीले जनाएको छ।

जिल्ला प्रहरी कार्यालय कपिलवस्तुका प्रमुख प्रहरी उपरीक्षक मनोहर भट्टका अनुसार शनिबार खोजीमा ८० भन्दा बढी नेपाल प्रहरी, करिब ५० जना सशस्त्र प्रहरी र सयभन्दा बढी स्थानीय सहभागी भएका थिए। टोलीले जंगलका विभिन्न सम्भावित क्षेत्रमा खोजी गरे पनि अहिलेसम्म कुनै उपलब्धि हासिल हुन सकेको छैन।

खोजीका क्रममा सिंहले प्रयोग गरेको लु १ प ७८७९ नम्बरको एभेन्जर मोटरसाइकल भने जंगलभित्र खोल्सो पार गर्न नसकेको अवस्थामा भेटिएको छ। मोटरसाइकल भेटिए पनि सिंहको अवस्था अज्ञात रहेकाले प्रहरीले खोजीलाई थप तीव्र बनाएको छ।

प्रहरी उपरीक्षक भट्टले आइतबार पनि सुरक्षाकर्मी र स्थानीयको सहभागितामा खोजी जारी रहने बताएका छन्। सिंहको खोजीका साथै घटनासँग जोडिएका अन्य प्राविधिक पक्षबाट समेत अनुसन्धान भइरहेको प्रहरीले जनाएको छ।