सुर्खेतमा ५५ वर्षीया महिलाको मोटरसाइकलको ठक्करबाट मृत्यु

सुर्खेत । मोटरसाइकलको ठक्करबाट  सुर्खेतमा  एक महिलाको मृत्यु भएको छ । मृत्यु हुनेमा वीरेन्द्रनगर नगरपालिका–१० बरीपाटीकी ५५ वर्षीया आशा बुढा रहेको प्रहरीले जनाएको छ।

जिल्ला प्रहरी कार्यालय सुर्खेतका अनुसार शनिबार राति ११ः४५ बजे लेकबेसी नगरपालिका–१० झुप्रामा मोटरसाइकलले ठक्कर दिँदा बुढा गम्भीर घाइते भएकी थिइन् । लेकबेसीबाट भूतचोकतर्फ आउँदै गरेको भे ६ प ४७३ नम्बरको मोटरसाइकलले उनलाई ठक्कर दिएको थियो ।

दुर्घटनामा गम्भीर घाइते भएकी  बुढालाई उपचारका लागि सुरुमा माया नर्सिङ होम अस्पताल लगिएको थियो । त्यहाँ उपचार सम्भव नभएपछि प्रदेश अस्पताल हुँदै नेपालगन्जको नरसिंह होम अस्पतालमा लगिएको  सुर्खेत प्रहरीले जनाएको छ।
उपचारकै क्रममा नेपालगन्जमा आज बिहान ७ः२० बजे बुढाको मृत्यु भएको सुर्खेत प्रहरीले  जानकारी दिएको छ भने लेकबेसी नगरपालिका–१० का मोटरसाइकल चालकलाई नियन्त्रण लिएर अनुसन्धान अगाडि बढाइएको छ।