क्यानडा र अस्ट्रेलिया पठाउने भन्दै ५८ लाखभन्दा बढी ठगी, दुई जना पक्राउ

काठमाडौं । वैदेशिक रोजगारीका लागि आकर्षक तलबमा क्यानडा र अस्ट्रेलिया पठाइदिने प्रलोभन देखाएर ५८ लाख रुपैयाँभन्दा बढी ठगी गरेको आरोपमा प्रहरीले दुई जनालाई पक्राउ गरेको छ ।

पक्राउ पर्नेमा काठमाडौं महानगरपालिका–२६ बस्ने २८ वर्षीय रोजन डंगोल र तारकेश्वर नगरपालिका–६ बस्ने काठमाडौं महानगरपालिका–१६ का ३१ वर्षीय किसान श्रेष्ठ रहेका छन् ।

प्रहरीका अनुसार रोजनले क्यानडा पठाइदिने भन्दै एक जना पीडितबाट ३७ लाख २७ हजार रुपैयाँ र किसानले अस्ट्रेलिया पठाइदिने भन्दै अर्का एक जना पीडितबाट २० लाख ७० हजार रुपैयाँ लिएका थिए । रकम लिएपछि दुवै जना सम्पर्कविहीन भएको भन्दै पीडितले प्रहरीमा उजुरी दिएका थिए ।

उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले रोजनलाई काठमाडौं महानगरपालिका–१२ र किसानलाई तारकेश्वर नगरपालिका–६ बाट पक्राउ गरेको हो ।

पक्राउ परेका रोजनलाई थप अनुसन्धान तथा कारबाहीका लागि जिल्ला प्रहरी परिसर काठमाडौं, भद्रकाली पठाइएको छ भने किसानलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।