लागूऔषधविरुद्धको प्रहरी कारबाहीमा १८ जना पक्राउ

काठमाडौं । काठमाडौंसहित देशका विभिन्न जिल्लामा प्रहरीले लागूऔषधसहित १८ जनालाई पक्राउ गरेको छ । प्रहरीले काठमाडौं, मोरङ, सुनसरी, बर्दिया, मकवानपुर र ललितपुरका विभिन्न स्थानबाट उनीहरूलाई पक्राउ गरेको हो ।

काठमाडौंको दक्षिणकाली नगरपालिका–५ फर्पिङ बसपार्कबाट ट्रामाडोल ८ सय २६ ट्याब्लेट र नाइट्राजेपाम ३ हजार ट्याब्लेटसहित दुई जना पक्राउ परेका छन् । पक्राउ पर्नेमा बारा जीतपुरसिमरा उपमहानगरपालिका–१४ का २२ वर्षीय अनन्त चौधरी र नुवाकोट तादी गाउँपालिका–४ की २२ वर्षीया ईसिका थापा छन् ।

इलाका प्रहरी कार्यालय फर्पिङबाट खटिएको टोलीले सर्लाहीबाट काठमाडौं आउँदै गरेको ना१ ज ३६१९ नम्बरको सुमो जाँच गर्ने क्रममा उनीहरूलाई लागूऔषधसहित पक्राउ गरेको हो।

त्यस्तै, काठमाडौं महानगरपालिका–३१ संगम चोकबाट ३ ग्राम २ सय १० मिलिग्राम खैरो हेरोइनसहित चार जना पक्राउ परेका छन्। पक्राउ पर्नेमा काठमाडौं महानगरपालिका–२९ मैतीदेवी बस्ने कैलालीको टीकापुर नगरपालिका–१ घर भएका २१ वर्षीय अमन स्वारसमेत छन् । प्रहरी वृत्त नयाँ बानेश्वरबाट खटिएको टोलीले उनीहरूलाई पक्राउ गरेको हो ।

मोरङको विराटनगर महानगरपालिका–१६ दरैयाबाट २ ग्राम २ सय ३० मिलिग्राम खैरो हेरोइनसहित लेटाङ नगरपालिका–५ बस्ने ३० वर्षीय विशेष मगर पक्राउ परेका छन् । लागूऔषध नियन्त्रण ब्युरो शाखा कार्यालय विराटनगरसमेतबाट खटिएको टोलीले भारतबाट नेपालतर्फ आउँदै गरेको को ३१ प २४७७ नम्बरको मोटरसाइकलमा सवार उनलाई पक्राउ गरेको हो ।

यसैगरी, मोरङको रंगेली नगरपालिका–८ झमनपुरबाट १० ग्राम १ सय मिलिग्राम खैरो हेरोइनसहित तीन जना पक्राउ परेका छन्। पक्राउ पर्नेमा कानेपोखरी गाउँपालिका–७ का २१ वर्षीय अर्पन जोगीसमेत छन् । इलाका प्रहरी कार्यालय रंगेलीबाट खटिएको टोलीले रंगेलीबाट कानेपोखरीतर्फ जाँदै गरेको को २ ह ४१८२ नम्बरको सिटी सफारी जाँच गर्ने क्रममा उनीहरूलाई पक्राउ गरेको हो ।

सुनसरीको इनरुवा नगरपालिका–४ बसचोकबाट १ ग्राम ८६ मिलिग्राम ब्राउन सुगरसहित मोरङको केराबारी गाउँपालिका–३ का २४ वर्षीय सुमन राई पक्राउ परेका छन् । जिल्ला प्रहरी कार्यालय सुनसरीसमेतबाट खटिएको टोलीले उनलाई पक्राउ गरेको हो ।

सोही स्थानबाट ६ ग्राम ४० मिलिग्राम ब्राउन सुगरसहित तीन जना पक्राउ परेका छन् । पक्राउ पर्नेमा इटहरी उपमहानगरपालिका–२ का ३२ वर्षीय भविन प्रधान, ३० वर्षीय रबिन कुमार प्रधान र इटहरी–३ का ३१ वर्षीय मुकेन्द्र कुमार राई छन् ।

बर्दियाको गुलरिया नगरपालिका–११ गणेशपुर बाइपासबाट २ ग्राम ९ सय ५० मिलिग्राम ब्राउन सुगरसहित दुई जना पक्राउ परेका छन् । पक्राउ पर्नेमा जाजरकोटको छेडागाड नगरपालिका–१० का २२ वर्षीय कृष्ण जंग शाह र सुर्खेतको भेरीगंगा नगरपालिका–४ का २७ वर्षीय पुरन बुढा मगर छन् । प्रहरी चौकी महम्मदपुरबाट खटिएको टोलीले उनीहरूलाई पक्राउ गरेको हो ।

मकवानपुरको हेटौंडा उपमहानगरपालिका–९ बाट ५ सय २० मिलिग्राम खैरो हेरोइन र १२ हजार ५ सय रुपैयाँ नगदसहित हेटौंडा–१२ पदमपोखरीका २८ वर्षीय सुदास लोप्चन पक्राउ परेका छन् । इलाका प्रहरी कार्यालय पशुपतिनगरबाट खटिएको टोलीले उनलाई पक्राउ गरेको हो ।

त्यस्तै, ललितपुरको महालक्ष्मी नगरपालिका–६ सानागाउँबाट ट्रामाडोल ७२ ट्याब्लेटसहित २४ वर्षीय सुजन सुनार पक्राउ परेका छन् । मकवानपुरको हेटौंडा उपमहानगरपालिका–७ घर भई सानागाउँ बस्ने उनलाई प्रहरी प्रभाग लुभुबाट खटिएको टोलीले पक्राउ गरेको हो । प्रहरीले घटनाबारे थप अनुसन्धान गरिरहेको जनाएको छ ।