लागुऔषधविरुद्धको प्रहरी कारबाहीमा १० जना पक्राउ

काठमाडौं । लागुऔषधविरुद्धको कारबाहीमा प्रहरीले पाँच जिल्लाबाट १० जनालाई पक्राउ गरेको छ। उनीहरूको साथबाट ब्राउनसुगर, खैरो हेरोइन र गाँजा बरामद भएको छ।

पर्साबाट ब्राउनसुगर जस्तो देखिने पदार्थ १ ग्राम ५० मिलिग्रामसहित १ जना पक्राउ परेका छन्। पक्राउ पर्नेमा बाराको कोल्हवी नगरपालिका–८ निवासी २० वर्षीय समिर बराल  रहेको प्रहरीले जनाएको छ।

त्यस्तै धनुषाबाट खैरो हेरोइन जस्तो देखिने पदार्थ ५ ग्राम ३३० मिलिग्राम र नगद ३१ हजार ४६० रुपैयाँसहित १ जना पक्राउ परेका छन्। पक्राउ पर्नेमा शहिदनगर नगरपालिका–३ निवासी २१ वर्षीय उपेन्द्र मण्डल रहेको प्रहरीले जनाएको छ।

प्रहरीका अनुसार सुनसरीबाट गाँजा ४ किलो ६० ग्रामसहित ३ जना पक्राउ परेका छन्। पक्राउ पर्नेमा बर्जु गाउँपालिका–५ का २७ वर्षीय डोमा पासवान, २३ वर्षीय पवनकुमार यादव र भारत अररिया निवासी २३ वर्षीय सोनु यादव छन्। त्यस्तै, सुनसरीकै इटहरीबाट खैरो हेरोइन जस्तो देखिने पदार्थ ९९० मिलिग्रामसहित थप ३ जना पक्राउ परेका छन्।

प्रहरीले झापाको बिर्तामोडबाट ब्राउनसुगर जस्तो देखिने पदार्थ ७०० मिलिग्रामसहित २ जना पक्राउ गरेको छ। पक्राउ पर्नेमा बिर्तामोड नगरपालिका–७ का २० वर्षीय राहुल शेखसमेत रहेका छन्। पक्राउ परेकाहरूमाथि प्रहरीले थप अनुसन्धान गरिरहेको प्रहरीले जनाएको छ।