दुर्घटना न्यूनीकरणमा बाँके ट्राफिकको प्रयास जारी, अगैया-फत्तेपुर सडकमा ट्राफिक सचेतना जरुरी

अनिल गौतम /नेपालगन्ज  । जिल्ला ट्राफिक प्रहरी कार्यालय बाँकेले दुर्घटना न्यूनीकरणका लागि गरेको ट्राफिक सचेतना कार्यक्रम निरन्तर जारी छ।

दिनहुुँ सवारी चालक, सहचालक, पैदलयात्री लगायत स्थानीयवासीलाई ट्राफिक सचेतना दिदै आएको बाँके ट्राफिक प्रहरी कार्यालयले जिल्लाका विभिन्न स्थानमा आज बिहानैदेखि पुनः सचेतना कार्यक्रम सुरु गरिसकेको बाँके ट्राफिक प्रहरी प्रमुख प्रहरी निरीक्षक पुष्कर पन्तले बताए।

पन्तका अनुसार ब्यस्त हुने राजमार्ग, हुलाकी राजमार्ग लगायत विभिन्न स्थानमा ट्राफिक सचेतना सुरु गरिएको छ।

त्यस्तै ट्राफिक प्रहरीले जिल्लाका भित्री सडक खण्डका विभिन्न स्थानमा हुस्सु र कुहिरोबाट हुने दुर्घटनाबाट बच्नका लागि विशेष गरी दुई पाङ्ग्रे सवारीसाधनका चालकलाई सचेतना दिदै आइरहेको छ।

ट्राफिक प्रहरीले यतिबेला चालकहरुसहित आम स्थानीयवासीलाई भेला गराएर ट्राफिक नियम ,लेन अनुशासन ,ओभेरटेक गर्ने तरिका , सडक प्रयोग गर्दा ध्यान दिनुपर्ने कुरा ,सवारी दुर्घटनाबाट बच्ने उपायका बारेमा सचेतना दिइरहेको प्रमुख पन्तले जानकारी दिएका छन् ।

तर, यतिबेला राप्ती सोनारी गाउँपालिकाको अगैया-फत्तेपुर सडकखण्डमा पनि जिल्ला ट्राफिक प्रहरी बाँकेले त्यहाबाट गुड्ने सवारीसाधनका चालक र स्थानीयहरुलाई पनि ट्राफिक सचेतना दिन अति जरुरी देखिएको छ। 

राप्ती सोनारी गाउँपालिकाका प्रवक्ता तथा वडा नं.४ का वडाध्यक्ष मीनराज खड्का (सन्तोष) भन्छन् -" यो सडकखण्डमा धेरै दुर्घटना भइरहेकाले ट्राफिक प्रहरीले हप्तामा एकपटक भएपनी सचेतना दिन आवश्यक रहेको छ।"

ट्राफिक प्रहरीले विशेष गरि यस सडकखण्डलाई पनि महत्त्व दिएर ट्राफिक प्रहरी सचेतना दिनुपर्ने खड्काले बताए ।

हाल बाँके ट्राफिक प्रहरी कार्यालयले दुर्घटना न्यूनीकरणका लागि गरिरहेको कदमले जिल्लामा दुर्घटनाको संख्या कम हुँदै गएको देखिन्छ।