चोरी गरेर नम्बर प्लेट फेरिएको मोटरसाइकलसहित दुई जना ट्राफिक प्रहरीको नियन्त्रणमा

काठमाडौं । ट्राफिक प्रहरीले मोटरसाइकल चोरीमा संलग्न दुई युवकलाई पक्राउ गरेको छ। ट्राफिक प्रहरीले वास्तविक नम्बर बागमती प्रदेश ०२-०५४ प १४ ३५ रहेको मोटरसाइकलको नम्बर परिवर्तन गरी बागमती प्रदेश ०२-०५३ प १७ ३५ राखेर चलाउदै गरेको अवस्थामा नुवाकोट र धादिङका दुई युवकलाई पक्राउ गरेको जानकारी दिएको छ।

काठमाडौं उपत्यका ट्राफिक प्रहरीका अनुसार नुवाकोटको तादी गाउँपालिका-३ खरानीटार घर भएर हाल काठमाडौंको प्यूटार बस्ने २२ वर्षीय रोशन भण्डारी र धादिङको गंगाजमुना गाउँपालिका-५ फुलखर्क घर भएर हाल काठमाडौंको नेपालटार बस्दै आएका ३० वर्षीय रविन अधिकारीलाई चोरीको मोटरसाइकलसहित पक्राउ गरेकोककाठमाडौं उपत्यका ट्राफिक प्रहरी प्रमुख एसएसपी बिनोद घिमिरेले बताए।

वास्तविक नम्बर बागमती प्रदेश ०२-०५४ प १४ ३५ रहेको मोटरसाइकलको नम्बर परिवर्तन गरी बागमती प्रदेश ०२-०५३ प १७ ३५ राखि काठमाडौंको नेपालटारमा सडक किनारमा रोकिराखेको अवस्थामा भण्डारीलाई ट्राफिक प्रहरीले पक्राउ गरेको जनाएको छ। ट्राफिक प्रहरीले भण्डारीसँगको अनुसन्धानका क्रममा उक्त मोटरसाइकल अधिकारीबाट रोशनले लिएको भन्ने खुल्न आएपछि उनलाई समेत ट्राफिक प्रहरीले काठमाडौंको नेपालटारबाट पक्राउ गरेको हो । 

ट्राफिक प्रहरीले दिएको जानकारी अनुसार उक्त मोटरसाइकल बागलुङको वरेङ गाउँपालिका-२ घर भएका आदर्श पौडेलले काठमाडौंको म्हेपीबाट हराएको निवेदन पश्चात्  काठमाडौँ उपत्यका ट्राफिक प्रहरी कार्यालयले खोजतलास सुरु गरेको थियो। 

उपत्यका ट्राफिक प्रहरीले खोजतलास गर्ने क्रममा उक्त मोटरसाइकल नेपालटारमा सडक किनारमा रोकिराखेको अवस्थामा आइतबार नियन्त्रणमा लिएको थियो।

उपत्यका ट्राफिक प्रहरी कार्यालयले मोटरसाइकलसहित पक्राउ परेका भण्डारी र अधिकारीलाई आबश्यक अनुसन्धान र कारबाहीका लागि प्रहरी वृत लैनचौरमा पठाइएको ट्राफिक प्रहरी प्रमुख एसएसपी बिनोद घिमिरेले जानकारी दिएका छन्।

एसएसपी घिमिरे भन्छन् -"आफ्नो सवारी साधन सुरक्षित स्थानमा पार्किङ गर्ने, ह्विल लक, चेन लक,ह्यान्डिल लक, डिस्क लक, लगायत सुरक्षा साइरनहरू जडान गर्नुका साथै मानिसहरूको आवत जावत नहुने एकान्त स्थानमा पार्किङ नगर्न हुन अनुरोध छ।"

सवारी साधन हराएमा ट्राफिक प्रहरीको हटलाईन नम्बर १०३, नेपाल प्रहरीको हटलाइन नम्बर १०० मा तत्कालै आफ्नो सवारी साधनको विवरण सहित फोन गर्न र नजिकैको प्रहरी कार्यालयमा निवेदन दिन एसएसपी घिमिरेले बताएका छन् ।